1 "Sonekela kuli kangelo uaku cikungulukilo ca mu Salandesiya nguove,

"Aua akeuo mezi a uje ali na vimbembesi vitanu na vivali via Njambi na vintanga ntanga vitanu na vivali. Njazivuka vipangi vieni, vakahandeka nguavo uyoya vuno honi unatsi. 2 Hinduka kaha kolesa vije vinasalako vije vili muyehi nakutsa. Muomu njinauana vipangi viove kuvia lumbunukile ku mesho a Njambi yange. 3 Nankuma, vuluka vije viuatambuile na vije viuevuile, vitulike kaha tenguluka ku vipi viove. Nga shove kuhinduka njikeja ngue muizi, kaha ku ukazivuka cipue ntsimbu muka njikeja kuli yove. 4 Vuno honi hanga mucili na vantu vavandende mu Salandesiya, vaje kuvahakele mpumputa ku vuzalo vuavo, kaha vakenda hamo nange mukutoka, muomu cavapande. 5 Kuli uje akahiana, akavazika vuzalo vuje vuakutoka, kaha kunjikahumisa lizina liendi mu livulu lia muono. Njikahandeka lizina liendi ku mesho a Tate naku mesho a tungelo vendi.

6 "Uje uoshe ali na matuitui evuilile vije Cimbembesi ali nakuhandeka ku vikungulukilo!

7 "Sonekela kuli kangelo uaku cikungulukilo ca mu Filandelufiya nguove,

"Aua akeuo mezi a uje umo Uakulela uje ua Vusunga. Uje ali na sapi ya Ndaviti, kaha vije ashokolola naumo uahi asa kuvishoka, na vije ashoka naumo uahi asa kuvishokolola. 8 Njazivuka vipangi vieni, tala njinashokolola cikolo kulutue luove, cije naumo uahi asa kucishoka. Njazivuka nguange uli na nzili yaindende, vuno honi hanga unatulika lizi liange kaha ku uavianene lizina liange. 9 Tala njikapuisa vaje vaka njivo ya malombelo ya Satana vaje vakahandeka nguavo vakevo vapua Vayunda vuno honi houe vapua lika vaka makuli, tala, njikavalinga ngeci vakeje na kutsikama ku viliato viove. Voshe vakazivuka ngeci nkuma njakuzanga. 10 Muomu unaniungu lizi liange nakusimpa calukakateya, kaha njikakuniunga ha ntsimbu ya vieseko vije vilinakuija ha mavu oshe, vije vija nakueseka vaje voshe vakala ha mavu. 11 Njilinakuija vuasi vuasi. Kaha kakateya kuli vije ulinavio, linga keti kukale umo akunieke cilongo cove. 12 Uoshe uje akahiana njikamupuisa cisimi ca seho mu njivo ya Njambi yange, kaha ka katuhukamo naua. Njikasoneka hali ikeye lizina lia Njambi yange na lizina lia nganda ya Njambi yange, Yelusalema yaiha ije ihuma kuli Njambi yange muilu kaha naua njikasoneka hali ikeye lizina liange lia liha.

13 "Uoshe uje alina matuitui evuilile vika vije Cimbembesi ali nakuhandeka ku vikungulukilo!

14 "Sonekela kuli kangelo uaku cikungulukilo ca mu Laondisiya nguove,

"Aua akeo mezi a Ameni, mukaleho uakulongua na vusunga, maputukilo a viakutanga via Njambi. 15 Njizivuka vipangi viove, keti u uakutontola cipue u uakuyukuma. Njatondele tele ngue ku uapuile u uakutontola cipue u uakuyukuma! 16 Nankuma muomu u uanguinie nguinie, keti u uakutontola cipue u uakuyukuma, kaha njikakujekula mukanua kange! 17 Ukahandeka nguove, ‘Njinafuku, njilina vufuko vuoshe, kaha nacimo njitonda cahi.’ Vuno honi ku uzivuka nguove umuka kuyanda, uivuisa ngozi, ucihutu, ukapuputua, naua ku uazalele vuzalo. 18 Nankuma njikunangula linga ulande ngolinde ya kuyengulula mu tuhia kuli yange, linga ufuke. Landa vuzalo vua kutoka uzale linga shuamua yakuhona vuzalo vuove keti imoneke. Landa na vihemba uhake mu mesho ove linga umone. 19 Kuli vaje voshe njazanga, njivindika na kuzangamesa. Kaha kaleni nantuima na kutenguluka ku vipi vieni. 20 Tala! Njinemana ku cikolo na kutota, nga kuli umo evua lizi liange na kushokolola cikolo, njikakovela na kulia nendi, kaha nendi naua akalia nange. 21 Uoshe uje akahiana, njikamuhana kapandi kakutumama nange ha litanda liange, ngue muje yange njahianene kaha njatumamene na Tate ha litanda liendi.

22 "Uoshe uje alina matuitui ovue vije Cimbembesi alina kuhandeka ku vikungulukilo!"