1 "Sonekela kuli kangelo uaku cikungulukilo ca mu Efeso nguove,

"Aua akeuo mezi endi uje uakuata vintanga ntanga vitanu na vivali mu livoko liendi lia cilio, uje akende hakati ka vitumbiko via vindeya via ngolinde vitanu na vivali. 2 Njazivuka vipangi vieni, muje mumuli nakupangela na nzili yoshe na kuvandamena ceni. Njazivuka nguange kumuasa kupangela hamo na vaka kulinga vupi, kaha muneseka vaje valitumbula nguavo vakevo tunganda vuno honi houe, kaha munauana nguavo vakevo vaka makuli. 3 Kaha naua njazivuka nguange muli nakuvandamena mukusimpa na kumona tuyando muomu ya lizina liange, kaha kumuahonene. 4 Vuno honi njili neci cimiluisa, munecela cije cizango cimuakele naco ha kulivanga. 5 Vulukeni kuli vije vinamiuisa. Tengulukeni ku vipi vieni kaha lingeni vipangi vije mualingile ha kulivanga. Nga keti ngoco kaha njikeja kuli yeni nakuhumisa vitumbiko via vindeya vieni mu vihela viavio. 6 Vuno honi vucili vueni ovu, muazinda vipangi via vantu vaje vakakava Nikolau, vije nange naua vinjazinda.

7 "Eceleni uoshe uje ali na matuitui linga evuilile kuli vije Cimbembesi ali nakuhandeka ku vikungulukilo!

"Kaha kuli uoshe uje muka kuhiana, njikamuhana kapandi kakulia ku muti ua muono uje uli mu Palandaisi ya Njambi.

8 "Sonekela kuli kangelo uaku cikungulukilo ca mu Simina nguove,

"Aua akeuo mezi a uje Uakuputukila na Kumanusuila, uje uatsile kaha uakele na muono naua. 9 Njazivuka mapakeso na kuhutua ceni, cipue vene munafuku. Njazivuka kushaula kuje vali nakumishaula vaje vahandeka nguavo vakevo vapua Vayunda vuno honi houe, vapua njivo ya malombelo ya Satana. 10 Keti muvue liova lia tuyando tuje tuli nakuija. Taleni, Liyavolo akahaka vamo veni mu kamenga mukumieseka, kaha mukakala mu mapakeso ha matangua akupua likumi. Pueni vakulongua cipue vene naku ku kutsa, kaha njikamihana cilongo ca muono.

11 "Uoshe uje ali namatuitui evuilile kuli vije Cimbembesi ali nakuhandeka ku vikungulukilo.

"Uoshe uje akahiana kakavulumuka ku kutsa ca mucivali.

12 "Sonekela kuli kangelo uaku cikungulukilo ca mu Pelengamu nguove,

"Aua akeuo mezi auje ali na mukuale uavutuesi kuvali. 13 Njazivuka kuje kumuakala, kuje kuakala litanda lia Satana. Vuno honi hanga muli na lukakateya ku lizina liange, kaha kumuavianene lutsilielo lueni muli yange cipue vene mu matangua a Antipase mukaleho uange uakulongua uje ivatsihile hakati keni, kuje kuakala Satana. 14 Vuno honi njilina viavindende viakumiluisa navio, muli na vamo kuje vaje vakakateya ku vilongesa via Mbalame, uje ualongesele Mbalake linga ahake citsuntsuiso ku vantu Vaisaleli linga valie viakulia vije vivana kombelela ku tumponia na kulinga vupangala. 15 Neni naua muli navamo vaje vanakakateya ku vilongesa via vaka Nikolau. 16 Nankuma, tengulukeni ku vipi vieni! Nga houe, kaha njija vuavuno kuli yeni nakulinga navo nzita ya mukuale ua mu kanua kange.

17 "Uoshe uje ali na matuitui evuilile vije Cimbembesi alinakuhandeka ku vikungulukilo.

"Kuli uoshe uje akahiana njikamuhana maana yavushueka, na livue lia kutoka kaha ha livue lia kutoka vanasonekaho lizina lia liha lije naumo uahi alizivuka kuvanga lika uje alitambula.

18 "Sonekela kuli kangelo uaku cikungulukilo ca mu Tiyatila nguove,

"Aua akeuo mezi a Muna Njambi, uje uakala na mesho ngue mulengi ua tuhia, uje viliato viendi viafua ngue vunengu vuakukuita mufuitilo. 19 Njazivuka vipangi vieni, na cizango ceni na lutsilielo lueni, na vukuasi vueni na kuvandamena ceni calukakateya. Njazivuka nguange vipangi vieni via kumanusuila vinapu viakama kupulakana viakulivanga. 20 Vuno honi njili nevi viakumiluisa navio, munecelela uje mpuevo Njezevele, uje akalitumbula ikeye vavenia nguendi kananguizi uampuevo, akatanganesa vangamba vange na vilongesa viendi linga valinge vukoyi na kulia viakulia via kukombelela ku tumponia. 21 Njamuhanene ntsimbu linga atenguluke ku vipi viendi, vuno honi naviana kutenguluka ku vilinga viendi via vukoyi. 22 Taleni, njimumbila ha muhela ua tuyando hamo na vaje vakalingi nendi vupangala, njikavombila mu mapakeso akama kuvanga noho vaka tenguluka ku vilinga viendi. 23 Njikatsiha vana vendi, kaha vikungulukilo vioshe vikazivuka nguavo yange uje njikatondo mana na mutima, kaha njikahana vuana ku muntu na muntu kuya ku vipangi viendi.

24 "Vuno honi kuli yeni munasalaho mu Tayatila, yeni vaje kuvakakateya ku vilongesa evi, vaje ku valilongesele vije vivatumbula vamo nguavo, ‘Viuma viakulova via Satana.’ Kaha kuli yeni njihandeka nguange kunjikaneha citeli ceka naua. 25 Kakateyeni lika kuli vije mulinavio noho njikeja. 26 Kuli uoshe uje ahiana na kutualelelaho kupanga vipangi viange na kuntsongo, njikamuhana nzili yakama ha mafuti, 27 kaha aka vayula na mbueti ya cikuvo kaha vaka saniozoka ngue muje ndeho ya vuma muikatavuka, ngue muje yange njatambuile nzili yakama kuli Tate, 28 kaha njikamuhana ntanga ntanga ya cimene.

29 "Uoshe uje ali na matuitui evuilile kuli vije Cimbembesi alina kuhandeka ku vikungulukilo.