1 Ambahoni njamuene kangelo uashulukile kuhuminina muilu, mu livoko liendi nakuata sapi ya cina cakuhona masima na lilienge liakama. 2 Uakuatele canza ngombe linoka ua laja, ikeye Liyavolo cipue Satana, kaha vamukutile miaka ya kupua likulukazi 1,000. 3 Kaha kangelo uombilile uje canza ngombe mucina cakuhona masima, kaha uashokeleko nakupatako kasateso, linga keti ase kukuisa vantu naua, kuvanga noho miaka likulukazi (1,000) inahiti, munima yevi vakamuzitula muka kantsimbu kakandende lika.

4 Ambahoni Njamuene matanda, kaha vaje vatumameneho vavahanene nzili yakusompa, njamuene naua miono ya vaje vavatetele mitue muomu vambuluile vusunga vuje vuasholuele Yesu na lizi lia Njambi, navaje kuvalemesele cikashama cipue cifua cendi, kaha kuvatambuile cimueso ha maholo avo cipue ha mavoko avo. Vasangukile kaha vayulile hamo na Kilistu ha miaka likulukazi (1,000) 5 Vaka kutsa vaje vasaleleho ku vayoyele naua kuvanga noho miaka ya kupua likulukazi 1,000 inahiti, eci cikeco kusanguka cakulivanga. 6 Uakukuisula na kulela uje akakala na mutambela kukusanguka ca kulivanga, nankuma kutsa ca mucivali kucesi nanzili hali vakevo, vuno honi vakapua vasasendote va Njambi na Kilistu, kaha vaka yula nendi miaka ya kupua likulukazi (1,000)

7 Munima ya miaka likulukazi (1,000), Satana vaka muzitula mukamenga. 8 Kaha akeja mukukuisa mafuti aje ali mu vimbango viuana via mavu, akeo Ngonge na Mangonge kuvakunguluila ku nzita, numelu yavo yapua ngue museke seke uaku cisali. 9 Kaha vendanganene mavu oshe na kuzenguluka cilombo ca vantu vakulela va Njambi nganda ivazanga, vuno honi tuhia tuahumine muilu na kuvanongesa. 10 Na Liyavolo uje uavakuisile naikeye vamumbilile mu cisali ca tuhia na Sulufa, muje muakele cikashama na kananguizi ua makuli, kaha vakayanda vutsiki na mutania ya yaye.

11 Ambahoni njamuene litanda liakama lia kutoka na uje uatumamaho, kaha mavu na lilu liateuele hamesho endi, kaha kuviakele na cihela naua. 12 Kaha njamuene vaka kutsa, vakama nava vavandende vanemana ha lutue lua litanda na mavulu akushokolola, kaha na livulu lieka valishokuelele, likelio livulu lia muono. na vaka kutsa va vasompele kuya namuje muvana sonekela mu mavulu, kuya kuvilinga viavo viva lingile. 13 Na cisali cahanene vaka kutsa vaje vakele muli cikeco, Vutsi na Vukalo vua vatsi vuahanene vaka kutsa vaje vakele muli vikevio, kaha muntu na muntu vamusompele kuya ku vilinga viendi. 14 Ambahoni Vutsi na Vukalo vua vatsi va vuimbilile mu cisali ca tuhia. Kaha cisali ca tuhia cikeco kutsa ca mucivali. 15 Nga muntu uoshe lizina liendi kuvalisonekele mu livulu lia muono, vaka mumbila mu cisali ca tuhia.