1 Ambahoni njatalele ku Munkinda ua Siyone kuje kuemanene Muna Mpanga, na vantu vakupua 144,000 vaje ha maholo avo vavasonekele lizina liendi neli lia Ishe. 2 Kaha njevuile lizi liakuhuma muilu lije liafuile ngue kukukuta ca mema ha cipupa na mikalateto ya cililimo cakama. Kaha lije lizi njovuile lialifuile ngue kuohia ca vaka tulialia vaje vemba ha tulialia tuavo, 3 kaha vembile muaso ua uha kulutue lua litanda na tusitu vakuyoya vauana na vakuluntu. Naumo uahi uasele kulilongesa uje muaso kuvanga lika vaje 144,000 vaje vavakulile ha mavu. 4 Ava vakevo vaje kanda valimone na vampuevo, vakevo ava vakakava Muna Mpanga, kuoshe akaya, ava vanavakulu kuhuma ku miyati yoshe kupua vushuka vuakulivanga vua Njambi na Muna Mpanga, 5 kaha mutunua tuavo kumuahumine makuli, kaha kuvakele na mulonga.

6 Ambahoni njamuene kangelo mukuavo apululuka mu vukambuila, na Muzimbu Uacili uayaye linga akambulule kuli vaje vakala ha mavu, ku mafuti oshe, naku miyati yoshe, na kuvindaka vioshe na ku vantu voshe. 7 Kaha uahandekele na lizi liakutambeka nguendi, "Ivuileni Njambi liova kaha muhaneni vumpau muomu ntsimbu ya kusompa cendi inahete, kaha lemeseni uje uatangele melu na mavu, na cisali na mavuelu vuelu."

8 Kaha kangelo ua mucivali uakavele uje uakulivanga, uahandekele nguendi, "Nau, nau Mbambilone uakama, uje ualingisile mafuti oshe kunua viniu viendi via vukoyi."

9 Kaha kangelo uamucitatu uje uakavele vaje vakuavo, uahandekele na lizi liakutambeka nguendi, "Nga uoshe alemesa cikashama na cifua cendi, nakutambula cimueso na kucihaka ha luholo luendi cipue ha livoko liendi, 10 naikeye akanua viniu via vutenu vua Njambi, vije ku vashingasanene mu nganja yendi ya vutenu, kaha vakayanda ku tuhia na sulufa ku mesho a tungelo vakulela na ku mesho a Muna Mpanga. 11 Kaha na vuisi vua tuyando tuavo vukaya muilu ha miaka yoshe, kaha ku vakahuimi vutsiki na mutania, ava vakevo vaka kulemesa cikashama na cifua cendi, kaha nauje uoshe akatambula cimueso ca lizina liendi."

12 Aha hakeho vene hali lukakateya ku vantu vakulela va Njambi, vaje vaka kuniunga mashiko a Njambi na lutsilielo lua Yesu.

13 Kaha njovuile lizi lije liahumine muilu ngualio, "Soneka eci: Vakukuisula vatsi vaje vatsila muli Muene kuhuma hano na kutualelaho."

"Cilivene vakukuisula." Cimbembesi ahandeka nguendi, "Linga vahuime ku vipangi viavo, muomu vilinga viavo vikavakava!"

14 Ambahoni njatalele, kaha njamuene lishuela lia kutoka, kaha haje ha lishuela hatumamene uakufua ngue Muna Muntu, na cilongo ca ngolinde ku mutue uendi, na mpoko ya kutejesa ya kuvambuka mu livoko liendi. 15 Kaha mukuavo kangelo uahumine mu Njivo ya Njambi uasanene uje uatumamene ha lishelua na lizi liakutambeka nguendi, "Ambata mpoko yove ya kutejesa, linga uteje, muomu ntsimbu yakuteja inahete, muomu kuteja ca mavu kunapuho." 16 Nankuma uje uatumamene ha lishuela uahuingisile mpoko yendi ya kutejesa ha mavu, kaha mavu va atejele.

17 Kaha mukuavo kangelo uahumine mu Njivo ya Njambi muilu, naikeye naua uakele na mpoko ya kutejesa ya kuvambuka. 18 Ambahoni kangelo mukuavo uahumine ku mutula, uje kangelo uakele na nzili yakama ha tuhia, kaha uatambekele na lizi liakutambeka kuli uje uakele na mpoko ya kutejesa ya kuvambuka nguendi, "Ambata mpoko yove ya kutejesa, kaha kungulula vushuka vua ku muti ua viniu vuaha mavu, muomu vushuka vuauo vunahi." 19 Nankuma uje kangelo uahuingisile mpoko yendi ya kutejesa ha mavu nakukungulula vushuka vua ha mavu, nakuvumbila mu cikamuino ca viniu ca vutenu vua Njambi. 20 Kaha cikamuino ca viniu vacikokelele hambanza ya nganda, kaha maninga a humine mu cikamuino ca viniu, asindumukile ngue vulaha vua muiva uamu kanua ka kavalu uakupua 1,600 kilomita.