1 Ambahoni vanjihanene citi cije califuile ngue citi cakusetekesa, kaha vanjilekele nguavo, "Ya ukaseteke njivo ya Njambi na mutula na vaje vakalemesela kuje. 2 Vuno honi keti ukaseteke mbalanda ya njivo ya Njambi. Ije yakaiseze muomu ikeyo vanaihana kuli vaka mafuti, kaha vakaliatangela ha nganda ya kulela ha vingonde makumi auana na vingonde vivali (42) 3 Kaha njikahana vakaleho vange vavali nzili yakuambulula vunanguizi ha matangua akupua likulukazi na vihita vivali na matangua makumi atanu na limo (1,260) oku vanazala mu vikeleya."

4 Ava vakevo ije miti ya olive ivali na vitumbiko via vindeya vivali vije viemana kulutue lua muene ua vaka mavu. 5 Kaha nga kukakala umo uje akavavulumuna, kaha tuhia tukahuma mutunua tuavo tukanongesa vitozi vavo, nga kukakala umo uje akavavulumuna, kaha kuvakazina zina kumutsiha. 6 Vali na nzili yakushoka lilu linga kalunga keti anoke ha matangua aje avakambulula vunanguizi vuavo. Kaha vali na nzili ya kutengulula mema linga apue maninga, kaha naua vali na nzili ya kupihisa mavu na tuyando tuoshe kuya muje muvatondelamo.

7 Kaha omo vanamanesa kuhana vukaleho vuavo, kaha uje cikashama akahumu mu cina cakuhona masima akalinga nzita navo kaha akavahiana na kuvatsiha, 8 kaha vivimbi viavo vakavilangeka mu tapalo ya nganda yakama ije ivatumbuile nguavo Sondoma na Ingito kuje kuvashukikile Muene uavo. 9 Ha matangua atatu na mbazuvuila ya litangua vamo vakahuma ku vantu voshe, na ku miyati, na ku vindaka, na ku mafuti mukuhilula vivimbi viavo nakuviana linga keti vavatsinde. 10 Kaha vaka mafuti vaka vuahelela cikuma muomu yavo. Vakalinga viuano na kulihana mavuana muomu ava tunanguizi vavali vayandesele vaka mavu. 11 Vuno honi munima ya matangua atatu na mbazuvuila ya litangua, muku ua muono uakuhuma kuli Njambi uavakovelele, vemanene kaha na vaje vavamuene vovuile liova. 12 Ambahoni vovuile lizi liakutambeka kuhuminina muilu lije liahandekele kuli vakevo ngualio, "Ijeni kuno." Vayile muilu mu lishelua oku vitozi vavo vali nakuvatalelela. 13 Ha ntsimbu ijevene kuakele mandunduma akama kaha mutambela ua vulikumi ua nganda ua siukile. Makulukazi atanu na avali (7,000) a vantu vatsile ku mandunduma. Kaha vaje vayoyeleho vakele na liova cikuma kaha vahanene vumpau kuli Njambi ua muilu.

14 Kayando kamucivali kanahiti, kaha kamucitatu vuavuno keja.

15 Ambahoni kangelo ua mucitanu na vavali uasikile tolombita yendi, kaha muilu muakele mezi akutambakana aje ahandekele nguauo, "Vumuene vua mavu vunapu honi vumuene vua Muene uetu na Kilistu uendi, kaha akayula ya yaye." 16 Kaha na vakuluntu vaje makumi avali na vauana vaje vatumama ha matanda avo kulutue lua Njambi, vavulamanene na kulemesa Njambi, 17 nguavo,

"Tuhana vitsantsela kuli yove Muene Njambi Uanzili yoshe, uje aliko na uje uakeleko!

Unambata nzili yove yakama

nakuputuka kuyula!

18 Vaka mafuti vanienguele cikuma

vuno honi vutenu vuove vuezile,

ha ntsimbu yakusompa vaka kutsa,

ya kuhana vuana ku vangamba vove, naku tunanguizi, naku vantu vove vakulela

nakuli vaje vevuilile liova lizina liove,

vakama hamo nava vavandende.

Nakunongesa vaje vaka kunongesa mavu!"

19 Ambahoni njivo ya Njambi muilu yashokolokele, na cikasa ca litavasano liendi casholokele mu njivo yendi Njambi. Kaha kuakele kuhiatula ca mihiato, na kumbalanganda, na vililimo na mandunduma na kalunga uakama ua civue.