1 Ambahoni njamuene cikuavo cimueso muilu cije capuile cakama na kukomouesa, tungelo vatanu na vavali vakele na tuyando tuakama tutanu na tuvali, tuje tuketuo tuamamanusuilo, muomu hali vakevo hakeho hahuila vutenu vua Njambi.

2 Njamuene cakulifua ngue cisali ca kalivanjelo ca kulipandakana na tuhia, na vaje vahianene cikashama na cifua cendi na numelu ya lizina liendi, vanemana kumukulo ua cisali ca kalivanjelo na tulialia tua Njambi mu mavoko avo. 3 Kaha vembile muaso ua Mosesa, ngamba ya Njambi, na muaso ua Muna Mpanga, nguavo,

"Vukama na kukomouesa kua vilinga viove,

Haaa Muene Njambi Uanzili yoshe!

Vingila viove viapua via vusunga na kuhona civembulu,

Haaa Muene ua mafuti oshe!

4 Haa Muene, nkuma iya kasakukuvuila liova

na kulemesa lizina liove?

Muomu yove lika uapua uakulela.

Mafuti oshe akeja

nakukulemesa,

muomu kusompa cove vanacisholola." 5 Hanima yevi, njamuene Njivo ya Njambi ya shokoloka muilu ikeyo ije mbalaka ya vukaleho, 6 kaha mu njivo ya Njambi muahumine tungelo vatanu na vavali, na tuyando tuakama tutanu na tuvali, vazalele vintanga viakutoka too via liniu, kaha valikutile miva ya ngolinde ha vintulo viavo. 7 Kaha umo ua tusitu vakuyoya vauana uahanene vaje tungelo vatanu na vavali malonga a ngolinde atanu na avali a kushula na vutenu vua Njambi uje uayoya miaka yoshe ya yaye. 8 Kaha Njivo ya Njambi yashulile na vuisi vuaku vumpau vua Njambi naku nzili yendi, kaha naumo uahi uasele kukovela mu njivo ya Njambi kuvanga noho tuyando tuakama tutanu na tuvali tua tungelo vatanu na vavali tuahuile.