1 Ambahoni njamuene lilu lia liha na mavu a maha. Muomu lilu liakulivanga na mavu a kulivanga vinahiti, na cisali kucakeleko naua. 2 Kaha njamuene nganda yakulela, Yelusalema yaiha, ije ili nakuija kuhuma muilu kuli Njambi, ije inalivuahesela ngue shombolua uje nalipesa pesela yaliendi. 3 Kaha njevuile lizi litambeka kuhuma ha litanda ngualio, "Taleni, mbalaka ya Njambi ili hamo na vantu. Akakala hamo navo, kaha vakapua vantu vendi, na Njambi vavenia akakala hamo navo. 4 Akahunda masozi oshe ku mesho avo, kaha kutsa kucikakalako naua, cipue vusiua, cipue kulila, cipue kuvua kuvavala, muomu viuma vioshe via laja vinahiti."

5 Kaha uje uatumama ha litanda uahandekele nguendi, "Taleni, Njikalinga viuma vioshe vipue via viha." naua uahandekele kuli yange nguendi, "Soneka evi, muomu aua mezi apua a kukonkama na vusunga." 6 Kaha uahandekele kuli yange nguendi, "Calingiua! Yange Alufa na Omenga, maputukilo na mamanusuilo. Kaha kuli vaje voshe valinampuila njikavahana mema a kunua a mu livuelu vuelu lia mema a muono cakuhona fueto. 7 Uje akahiana akasuana viuma vioshe, njikapua Njambi yendi, kaha na ikeye akapua munange. 8 Vuno honi vaka liova, na vaka kuhona lutsilielo, na vakakulinga via vuniengue, na vaka kutsiha na vaka vupangala, na vaka mantseno na vaka kulemesa tumponia na vaka makuli, cihela cavo cikapua mu cisali cakuuema na tuhia na sulufa, cikeco kutsa ca mucivali."

9 Ambahoni umo ua vaje tungelo vatanu na vavali vaje vakele na malonga atanu na avali akushula na tuyando tuakama tutanu na tuvali tuakumanusuila, uezile kuli yange nakuhandeka nguendi, "Ija kuno, njikakumuesa Shombolua, mpuevo ya Muna Mpanga." 10 Kaha uanjambatele mu cimbembesi na kunjituala ku munkinda uakama ualaha, uanjimuesele Yelusalema, Nganda Yakulela, ije yahumine muilu kuli Njambi, 11 kaha yakele na vumpau vua Njambi. Nganda ije ya viazimine ngue livue lia seho cikuma, ngue livue lia Njasipa, lia kutungukua ngue kilisitale. 12 Yakele na civumbe cakama calaha, na vikolo likumi na vivali, kaha tungelo likumi na vavali vaniungile kuje kuvikolo. Kaha haje ha vikolo vasonekeleho mazina likumi na avali a miyati ya vantu Vaisaleli. 13 Kumutambela umo na umo kuakele vikolo vitatu, ku ngangela vikolo vitatu, na mu kunto vikolo vitatu, namu mbuela vikolo vitatu, na mu kangombe kayambi vikolo vitatu. 14 Kaha civumbe ca nganda cakele na mavula likumi na avali, na ha mavula hakele mazina likumi na avali a tunganda va Muna Mpanga. 15 Kaha nauje kangelo uahandekele kuli yange uakele na mbueti yakusetekesa ya ngolinde, linga a seteke nganda na vikolo viayo na vivumbe viayo. 16 Kaha ije nganda yakele na vimbango viuana, seteko yavio muvulaha na mu vuihi vioshe viapuile hamo. Uasetekele ije nganda na mbueti yendi yakusetekesa, yapuile makilomita 2,200 mu vulaha na mu vuihi namukulaha kuayo. 17 Uje kangelo naua uasetekele civumbe cayo cije capuile mamita makumi atanu na limo na atanu (65) kuya mukuseteka ca muntu. 18 Cije civumbe vacitungile na mavue a njasipa, na ije nganda vaitungile na mavue a ngolinde a kuviakuma ngue kalivanjelo. 19 Mavula a civumbe ca nganda va apesa pesele na miyati yoshe ya mavue a seho. Cakulivanga capuile livue lia njasipa, ca mucivali capuile safile, ca mucitatu capuile angeta, ca muciuana capuile emalinde, 20 camucitanu capuile onikisi, ca mucitanu na cimo capuile kanelia, ca mucitanu na vivali capuile kuataze, ca mucitanu na vitatu capuile mbelilu, ca mucitanu na viuana capuile topaze, ca vulikumi capuile kalesendoni, cavulikumi na cimo capuile takuoise, cavulikumi na vivali capuile emesita. 21 Kaha navije vikolo likumi na vivali viapuile via vusanga vuaseho likumi na vuvali, cikolo cimo na cimo vacipangele ha vusanga vumo, na tapalo ya nganda vaipangele ha ngolinde ya cili, yakutungukua ngue kalivangelo.

22 Kaha kunjamuene cipue imo njivo ya Njambi mu nganda, muomu njivo ya Njambi yayo yapua Muene Njambi uanzili yoshe na Muna Mpanga. 23 Muje mu nganda kumuatondekele kutua ca litangua cipue ngonde, muomu vumpau vua Njambi vukevuo ceke cayo, na Muna Mpanga ikeye ndeya yamuo. 24 Mafuti oshe akenda ha ceke camuo, kaha vimiene vaha mavu vakahana vumpau vuavo kuli ikeyo. 25 Vikolo viayo kuvaka vishoko litangua ku litangua, na vutsiki kuvukakalamo muje. 26 Muje mu nganda vakanehamo vumpau na kasingimiko via mu mafuti. 27 Vuno honi kukuesi cuma cakujuala cikakovelamo muje mu nganda, cipue uoshe uje akalingi via kasauntu cipue muka makuli kakakovelamo, vuno honi kuvanga lika vaje vavanasoneka mu livulu lia muono lia Muna Mpanga.