1 Ambahoni njamuene naua kangelo mukuavo ua nzili uje uahumine muilu. Uazalele lishelua kaha uakele na nkongolo ha mutue uendi, na cihanga cendi cafuile ngue litangua, kaha na mikono yendi yafuile ngue vimpanda via tuhia. 2 Uakele na livulu lialindende liakuzenga liakufukuka mu livoko liendi. Ualiatele mukono uendi ua cilio ha cisali kaha ukuavo mukono uendi ua cimoshue ha ntunda, 3 kaha uatambekele na lizi liakama ngue ndumba ohia. Omo uatambekele, kaha vililimo vitanu na vivali vialumine. 4 Kaha munima yakuluma vije vililimo vitanu na vivali, njatondele kusoneka vuno honi njovuile lizi kuhuma muilu ngualio, "Niunga mu mutima uove lika vije vivinahandeka vije vililimo vitanu na vivali, kaha keti uvisoneke." 5 Ambahoni kangelo uje injamuene nemana ha cisali na ha ntunda uoluele livoko liendi lia cilio muilu, 6 kaha ualisingile hali ikeye uje uayoya miaka yoshe ya yaye, uje uatangele lilu na vioshe vije vilimo, na mavu na vioshe vije vilimo, na cisali na vioshe vije vilimo. Kaha uahandekele nguendi, "Ku kukakala naua kusimbula! 7 Vuno honi mu matangua aje omo kangelo uamucitanu na vavali akasika tolombita yendi kaha cisinkiko ca Njambi cikalishulisisa ngue muje mualekele vangamba vendi, tunanguizi."

8 Ambahoni lizi lije linjovuile kuhuma muilu lia handekele kuli yange naua ngualio, "Ya ukambate lije livulu lia lindende lia kuzenga lia kufukula lije lili mu livoko lia kangelo uje nemana ha cisali na ha ntunda."

9 Nankuma njaile kuli uje kangelo nakumuleka nguange anjihane lije livulu lia kuzenga lia lindende. Kaha uahandekele kuli yange nguendi, "Liambate kaha lilie, likashasha mu lizimo liove, vuno honi likapuelelela ngue vuci mu kanua kove." 10 Kaha njanonele lije livulu liakuzenga lia lindende mu livoko lia kangelo na kulilia, lia puelelele ngue vuci mu kanua kange. Vuno honi omo njalilile, liapuile lia kushasha muzimo liange. 11 Kaha uanjilekele nguendi, "Unapande naua kuambulula vunanguizi ku vantu vavengi na mu mafuti na mu vindaka na ku vimiene."