1 Kaha njamuene mu livoko lia cilio lia uje uatumamene ha litanda livulu liakuzenga lije liakusoneka helu na mukati, valipatele na tusateso tutanu na tuvali. 2 Kaha njamuene kangelo ua nzili yoshe uje uahandekele na lizi lia kutambeka nguendi, "Nkuma iya nafuila kushokolola otu tusateso tua livulu liakuzenga eli na kulifukula?" 3 Naumo uahi muilu cipue ha mavu cipue muintsi lia mavu uasele kushokolola lije livulu liakuzenga cipue kulitala mukati kalio. 4 Njalilile cikuma muomu naumo uahi uafuililile kushokolola lije livulu liakuzenga cipue kulitala mukati kalio. 5 Ambahoni umo ua vakuluntu uahandekele kuli yange nguendi, "Keti ulile. Tala! Ndumba uaku muyati ua Yunda, Muzi ua Ndaviti nahiana, kaha asa kushokolola eli livulu lia kuzenga na tusateso tualio tutanu na tuvali."

6 Kaha mukati ka litanda na tusitu vakuyoya vauana na hakati ka vakuluntu. Njamuene Muna Mpanga nemana oku ngue vanamutsihi, uakele na mambinga atanu na avali na mesho atanu na avali, akeuo aje vimbembesi vitanu na vivali via Njambi vije vianatumu ha mavu oshe. 7 Uje Muna Mpanga uayile nakuambata lije livulu liakuzenga ku livoko lia cilio lia uje uatumamene ha litanda. 8 Omo uambatele lije livulu liakuzenga, kaha vaje tusitu vakuyoya vauana na vakuluntu makumi avali na vauana vauililile ku viliato via Muna Mpanga. Umo na umo uakele na kalialia na malonga a ngolinde aje ashulile na ngongosi ya luengo luacili, evi vikevio malombelo a vantu va Njambi vakulela. 9 Vembile muaso uauha nguavo,

"Yove uafuila kuambata eli livulu lia kuzenga

nakushokolola tusateso tualio.

Muomu yove vakutsihile, kaha na maninga ove ualandele vantu kuli Njambi

kuhuma ku muyati, naku ndaka, naku vantu na cifuti.

10 Kaha uavapuisa vumuene na vasasendote kuli Njambi yetu,

kaha vakayula ha mavu."

11 Ambahoni njatalele, kaha njovuile mezi a tungelo vavengi, makulukazi ha makulukazi, na makumi a makulukazi ha makumi a makulukazi. Vazengelekele litanda, na tusitu vakuyoya na vakuluntu, 12 vahandekele na lizi liakutambeka nguavo,

"Nafuila ou Muna Mpanga ivatsihile

kutambula nzili, na vufuko, na mana, na nzili yoshe, na kasingimiko, na vumpau na vikuisulo!"

13 Kaha njovuile viakutanga vioshe muilu, na hano ha mavu, na muintsi lia mavu, na mu cisali, na vioshe vije vilimo, viahandekele nguavio,

"Kuli uje uatumama ha litanda na kuli Muna Mpanga,

kukale vikuisulo, na kasingimiko, na vumpau, na nzili yoshe,

ku miaka yoshe ya yaye!"

14 Kaha tusitu vakuyoya vauana vahandekele nguavo, "Ameni!" Kaha vakuluntu vauililile ha mavu na kulemesa.