1 Munima yevi njevuile cakulifua ngue lizi lia kutambeka lia vantu vaje vali muilu ngualio, "Haleluya! Kuovoka na vumpau na nzili viakundama kuli Njambi yetu! 2 Kusompa cendi capua ca vusunga na kuhona civembulu, nasompo cikoyi uakama cikuma uje uakuisile mavu na vukoyi vuendi, kaha vanamufuetesa maninga a vangamba vendi." 3 Vatambakanene naua nguavo, "Haleluya! Vuisi vuahumine hali ikeye vuayile muilu ya yaye." 4 Kaha vakuluntu makumi avali na vauana (24) na viakutanga via kuyoya viuana, vauile ha mavu nakulemesa Njambi uje natumama ha litanda nguavo, "Ameni. Haleluya!"

5 Kaha ha litanda kuahumine lizi ngualio, "Shangazaleni Njambi yetu, yeni voshe vangamba vendi, yeni vaje vamuvuila liova, vavandende neni vakama." 6 Ambahoni njevuile cimo cakulifua ngue lizi lia vantu vavengi, liakufua ngue kukukuta ca mema amengi, liakufua ngue mikalateto ya mihiato ngualio, "Haleluya! Muomu Muene Njambi uetu Uanzili yoshe yakama ayula. 7 Tujoleleni na kuvuahelela na kumuhana vumpau, muomu ntsimbu inahete ya vulo vua Muna Mpanga, kaha shombolua nalivuahesela laja. 8 Capuile kapandi ikeye kuzala ntanga ya kutoka too ya liniu." (Muomu lije liniu lia cili likelio vipangi via vusunga via vantu vakulela va Njambi)

9 Kaha kangelo uahandekele kuli yange nguendi, "Soneka evi, Vakukuisula vaje vavanalania ku ciuano ca vulo vua Muna Mpanga." Kaha uahandekele kuli yange naua nguendi, "Aua akeuo mezi a vusunga a Njambi."

10 Ambahoni njauililile kuviliato viendi nakumulemesa, Vuno honi uahandekele kuli yange nguendi, "Kuuapandele kucilinga! Yange nji ngamba lika ngue yove na kavusamba kove uje uakakateya kuvukaleho vua Yesu. Lemesa Njambi."

Muomu vukaleho vua Yesu vunapu cimbembesi ua vunanguizi.

11 Ambahoni njamuene lilu lia shokoloka, kaha taleni hajevene halutue luange kuakele kavalu uakutoka, kaha uje ualondeleho vamutumbuile nguavo Uakulongua na Vusunga, kusompa cendi na kulua cendi ca ciyulo. 12 Mesho endi apua ngue mulengi uatuhia, kaha ha mutue uendi nazala vilongo viavingi, kaha ali lizina lia kusoneka lije kuvazivuka voshe kuvanga lika ikeye vavenia. 13 Nazala vuzalo via kumbuitika mu maninga, kaha na lizina livamusana nalio linapu Lizi lia Njambi. 14 Masualale va muilu vaje valondele ha tuvalu vakutoka, vazalele mu liniu lia kutoka too vamukavele. 15 Mukanua kendi kuahumine mukuale ua kuvambuka ukeuo uakanongesa nauo mafuti. Kaha aka vayula na mbueti ya cikuvo, akakamuna viniu mu cikamuino ca viniu ca kuniengua ca vutenu vua Njambi muka Nzili yoshe. 16 Ha cizalo cendi na ha ntumba yendi hakala lizina ngualio, "Shukulu ua vashukulu na Muene ua vimiene."

17 Ambahoni njamuene kangelo nemana ha mutania, na lizi liakutambeka uasanene tuzila voshe vaje vakapululuka ha vukambuila nguendi, "Ijeni mulikungulule hamo ku ciuano cakama ca Njambi, 18 linga mulie mivila ya vimiene, na mivila ya vantuama va masualale, na mivila ya vamala vanzili, na mivila ya tuvalu na vaje vaka kulondaho, na mivila ya vantu voshe, vakupatuka na vandungo, na voshe vavandende nava vakama."

19 Ambahoni njamuene cikashama na vimiene vahano ha mavu na masualale vavo, valikunguluile hamo kulinga nzita nendi, uje ualondele ha kavalu na masualale vendi. 20 Kaha uje cikashama vamukuatele, hamo nakananguizi uendi ua makuli uje uamulingilileko vimueso, vije viakuisile navio vaje vatambuile cimueso ca uje cikashama na vaje valemesele cifua cendi, vaje vavali vavombilile tele vacili na kuyoya mu cisali ca tuhia tuakushukuma na sulufa. 21 Vaje vasaleleho vavatsihile na mukuale uje uahumine mukanua ka uje ualondele ha kavalu, kaha tuzila voshe valile mivila yavo ngue muvatondelelemo.