1 Kaha njamuene cikashama ahuma mu cisali. Uje uakele na mambinga likumi na mitue itanu na ivali, ha limbinga na limbinga hakele cilongo kaha na ha mutue na mutue hakele lizina lia kushaula. 2 Kaha uje cikashama injamuene uafuile ngue ingue, na viliato viendi viafuile ngue via mbeya, na kanua kendi kafuile ngue ka ndumba. Kaha canza ngombe uahanene nzili na litanda na nzili yendi yakama kuli cije cikashama. 3 Umo ua mitue ya uje cikashama uasholokele ngue vanau vulumuna, vuno honi mbandu yakukanguka. Mavu oshe akomokele kaha akavangeyele uje cikashama. 4 Vantu valemesele uje canza ngombe muomu ikeye uahanene nzili yendi yakama kuli cikashama. Kaha valemesele uje cikashama nguavo, "Nkuma iya nalifu na cikashama, kaha iya naua asa kuciluisa?"

5 Kaha uje cikashama vamuhanene kanua kakuhandeka mezi akulihalesa na akushaula, kaha vamuhanene nzili yakama yakupangesa ha vingonde viakupua makumi auana na vingonde vivali (42) 6 Cikashama uafukuile kanua kendi mukushaula Njambi, kushaula lizina liendi na cihela cendi cakala, na vaje voshe vakala muilu. 7 Kaha cikashama vacitavesele kuluisa vantu vakulela va Njambi nakuvahiana. Kaha vacihanene naua nzili yakama ha miyati yoshe na ku vantu voshe, naku vindaka vioshe na mafuti oshe. 8 Voshe vakala ha mavu vaka cilemesa, voshe vaje mazina avo kuva asonekele tele kanda vatunge luvula lua mavu mu livulu lia muono lia Muna Mpanga uje ivatsihile.

9 Uoshe uje alina matuitui ovue! 10 Nga umo vamukuata vunzinda, cilivene akapua cinzinda, nga umo vamutumbuila kumutsiha na mukuale, cilivene vakamutsiha na mukuale. Eci cikeco kusana ca lukakateya na lutsilielo lua vantu vakulela va Njambi.

11 Ambahoni njamuene naua cikashama cikuavo cije catuhukile mu mavu. Cakele na mambinga avali ngue Muna Mpanga kaha cakele nakuhandeka ngue canza ngombe. 12 Capangesele nzili yakama yoshe ya uje cikashama uakulivanga ku mesho endi. Calingisile mavu na vioshe vije viliho linga vilemese uje cikashama uakulivanga, uje mbandu yendi yakangukile. 13 Calingile vimueso viakama, cipue kupanga tuhia kuhuma muilu kuija hano ha mavu ku mesho a vantu voshe. 14 Muomu ya vimueso vije vivamutavesele kulinga ku mesho a cikashama uakulivanga, cakuisile vaje vakala ha mavu. Cavashikile linga vapange cifua mukusingimika uje cikashama ivavulumuine na mukuale kaha uayoyele naua. 15 Uje cikashama uamucivali vamutavesele kuhana muku muli cije cifua ca cikashama ca kulivanga linga cije cifua case kuhandeka na kulingisa voshe vaje kuvalemesa cije cifua ca cikashama linga vavatsihe. 16 Kaha naua uasindiye vantu voshe, vakama nava vavandende, vakufuka na vihutu, vaka kupatuka na vandungo linga vavahake cimueso ku livoko lia cilio cipue ha luholo, 17 ngeci naumo uahi alanda cipue kulandesa kuvanga uje alina cimueso, cikeco cije lizina lia uje cikashama cipue numelu ya lizina liendi.

18 Eci vacitumbula mana. Uoshe uje alina mana asa kueseka kuuana kulumbunuka ca numelu ya uje cikashama, muomu ikeyo inapu numelu ya muntu. Numelu yaco ikeyo yapua vihita vitanu na cimo na makumi atanu na limo na vitanu na cimo. (666)