1 Munima yevi njatalele, kaha njamuene cikolo cakushokoloka muilu. Kaha lizi lije linjovuile ha kulivanga lije liahandekele kuli yange ngue tolombita liahandekele ngualio, "Ija kuno, kaha njikakumuesa vije vinahatako munima yevi." 2 Ha ntsimbu imo njakele mu Cimbembesi, kaha njamuene litanda muilu na uje uatumameneho. 3 Kaha uje uatumameneho uasholokele ngue mavue aseho a njasipa na kanelia, kaha ku litanda kuazengulukile nkongolo ije yasholokele ngue mavue a emalinde. 4 Kuakele matanda makumi avali na auana aje azengelekele lije litanda, haje ha matanda hatumamene vakuluntu vakupua makumi avali na vauana vaje vazalele tuzaku tuakutoka na vilongo via ngolinde ku mitue yavo. 5 Ha litanda hahumine vihiatulo via muhiato, na cililimo na kuluma. Kaha halutue lua litanda hakele nakushukuma milengi ya tuhia itanu na ivali, eyi yapuile vimbembesi vitanu na vivali via Njambi. 6 Kaha naua kulutue lua litanda kuakele cije casholokele ngue cisali cakulifua ngue kalivangelo ka kutungukua ka livue lia kilisitale.

Ku mutambela umo na umo ua litanda kuazengelekele tusitu vakuyoya vauana vaje vakele na mesho kulutue na kunima. 7 Kasitu uakuyoya uakulivanga uafuile ngue ndumba, uamucivali uafuile ngue ngombe uankomba, uamucitatu uakele na cihanga ngue ca muntu, na uamuciuana uafuile ngue ngonga uakupululuka. 8 Kaha umo na umo uavaje tusitu vakuyoya uakele na mambava atanu na limo aje akele na mesho kuoshe na mukati. Vutsiki na mutania vakele nakuimba nguavo,

"Uakulela, uakulela, uakulela ikeye Muene Njambi Muka nzili yoshe,

uje uakeleko, uje aliko, ikeye uje akeja."

9 Ntsimbu yoshe vaje tusitu vakuyoya vakahana vumpau, na kasingimiko, na kutsantsela kuli ikeye uje uatumama ha litanda, uje uayoya ya yaye. 10 Vaje makumi avali na vauana a vakuluntu vakatsikama kuli uje uatumama ha litanda na kumulemesa ikeye uje uayoya ya yaye. Vakahaka vilongo viavo ha mavu kulutue lia litanda nakuimba nguavo,

11 "Muene uetu na Njambi yetu, yove uafuila kutambula vumpau na kasingimiko na nzili.

Muomu yove uatangele viuma vioshe,

kaha ha cizango cove vavitangele na kukalako."