1 Munima yevi njamuene tungelo vauana vanemana mu vimbango viuana via mavu, vakele nakuimika mpunzi mu vimbango viuana via mavu linga naimo yahi ipekumuke ha mavu, cipue ha cisali, cipue ku muti uoshe. 2 Ambahoni njamuene kangelo ashuluka kuhuma ku vutuhukilo vua litangua na kasateso ka Njambi ua kuyoya. Uasanene tungelo vauana vaje vavahanene nzili yakupihisa mavu na cisali na lizi liakutambeka nguendi, 3 "Keti mupihise mavu, cipue cisali, cipue miti, kuvanga noho tuahaka kasateso ha maholo a vangamba va Njambi yetu." 4 Kaha njovuile numelu ya vantu vaje vavahakele tusateso yapuile 144,000 kuhuminina ku miyati yoshe ya vana Vaisaleli. 5 Vakupua 12,000 kuhuminina ku muyati ua Yunda vavahakele tusateso, 12,000 kuhuminina ku muyati ua Luvena, 12,000 kuhuminina ku muyati ua Ngande, 6 12,000 kuhuminina ku muyati ua Ashele, 12,000 kuhuminina ku muyati ua Nafetali, 12,000 kuhuminina ku muyati ua Manase, 7 12,000 kuhuminina ku muyati ua Simione, 12,000 kuhuminina ku muyati ua Levi, 12,000 kuhuminina ku muyati ua Isakale, 8 12,000 kuhuminina ku muyati ua Zembuloni, 12,000 kuhuminina ku muyati ua Yosefa, na 12,000 kuhuminina ku muyati ua Mbenjemani.

9 Munima yevi njatalele, kaha taleni, njamuene civunga cakama cije naumo uahi asa kucitanda, kuhuminina ku mafuti oshe, na ku miyati yoshe, na ku vantu voshe naku vindaka vioshe vemanene kulutue lua litanda na kulutue lua Muna Mpanga. Vazalele tuzaku tuakutoka, kaha vambatele mintango ya mambale mu mavoko avo. 10 Valilile mukutambeka nguavo, "Kuovoka cakala kuli Njambi yetu uje uatumama ha litanda, na kuli Muna Mpanga!" 11 Kaha tungelo voshe vemanene na kuzengeleka litanda na vakuluntu na tusitu vakuyoya vauana. Va vulumanene kulutue lua litanda nakulemesa Njambi, 12 vahandekele nguavo, "Ameni! Vikuisulo, na vumpau, na mana, na citsantselo, na kasingimiko, na nzili na nzili yoshe vikale kuli Njambi yetu ku miaka yoshe ya yaye! Ameni!"

13 Ambahoni umo ua vakuluntu uanjihuile nguendi, "Veya ava vanazala tuzaku tuakutoka, nkuma vahuminina kuli?"

14 Njamukumbuluile nguange, "Uazivuka Muene." Kaha uahandekele kuli yange nguendi, "Ava vakevo vanahumu mu mapakeso akama. Vanakushu tuzaku tuavo na kututokesa mu maninga a Muna Mpanga. 15 Nankuma vali kulutue lia litanda lia Njambi, na kumupangela mutania na vutsiki mu Njivo ya Njambi. Kaha uje uatumama ha litanda akavaniunga nakukala cendi. 16 Kuvakatsiho naua njala, cipue kuivua mpuila naua, mutania ku ukavatuilaho, cipue mpunzi ya ntuima kuikavatuila, 17 muomu Muna Mpanga uje ali hakati ka litanda ikeye akapua kaniungi kavo, kaha akavatuamenena ku livuelu vuelu lia mema a muono. Kaha Njambi akahunda masozi oshe ku mesho avo."