1 Kaha munima yevi, njamuene kangelo mukuavo ahuma muilu, hakukala na nzili yakama, mavu aviakumine na vumpau vuendi. 2 Kaha uasanene na lizi liakutambeka nguendi, "Nau, nau, Mbambilone uakama, nahimpuka cihela ca mahamba, na vimbembesi vioshe via kujuala, na cihela ca tuzila voshe vavapi. 3 Muomu mafuti oshe ananu viniu via vukoyi vuendi, kaha na vimiene va ha mavu valingile vukoyi nendi, kaha vaka kulandesa va ha mavu vanafuku na vufuko vuendi vua mashungu a mapi."

4 Ambahoni njovuile lizi likuavo lije liahumine muilu ngualio,

"Humeni kuli ikeye, yeni vantu vange,

linga keti mulinge vupi vuendi,

linga keti mukundame ku tuyando tuendi tuakama.

5 Muomu vupi vuendi vualana ngue vulaha vua muilu,

kaha Njambi navuluka vipi viendi.

6 Mulingeni ngue muje mualingile vakuavo,

mufueteseni luvali ha vije vialingile,

mutsingasaneneni luvali mu nganja ije yatsingasanene.

7 Ngue kuya muje mualihanene vumpau ikeye vavenia na kuyoya vuyoye vuacili,

honi muhaneni seteko ya tuyando tuakama na kulila.

Muomu mu mutima uendi akahandeka nguendi,

‘Yange lisano njatumama,

keti yange ntuluue,

kunjikaliliho.’

8 Nankuma tuyando tuendi tuakama tukeja ha litangua limo,

mishongo, kulila na njala yakama,

kaha vakamutsimika na tuhia,

muomu Muene Njambi ikeye uanzili yoshe uje akamusompa."

9 Kaha vimiene vahano ha mavu vaje valingile navo vukoyi nakuyoya nendi vuyoye vuacili, vakalila nakutambeka omo vakamona vuisi vuakuuema cendi. 10 Vakemana kulahako nendi mukuteua tuyando tuendi nakuhandeka nguavo, "Naana! Naana! Nganda yakama, nganda ya nzili, Mbambilone! Kusompa cove cineja mu ntsimbu imo lika."

11 Kaha vaka kulandesa va hano ha mavu vaka mulila cikuma na kusikoka, muomu naumo uahi akalanda vufuko vuavo, 12 vufuko vua ngolinde, na siliva, na mavue aseho, na vusanga vuaseho, na vintanga via liniu, nevi viakuvenguluka, nevi viakusenena, nevi via kuvenga, nevi via miti yakunika muacili, na vivala via kupanga ha mazo a vanjamba, na via miti ya ndando yakama, na via vunengu, na via vikuvo, na via mavue akutoka akukola, 13 na sinamone, na nkundu, na ngongosi ya luengo luacili, na miila, na mazi a luengo luacili, na viniu, na oli, na vunga vua tiliku, na tiliku, na vangombe, na vampanga, na tuvalu, na matemba, na vandungo vikevio vije miono ya vantu. 14 "Vushuka vuje vu uatondele kukala navuo mu muono uove vunakuhumu, kaha vije vivuahelesa na vije vifukisa via kuseze, kaha ku ukaviuana naua!" 15 Vaka kulandesa va vufuko ovu, vaje vauanene vufuko kuhuminina kuli ikeye, vakemana kulahako, mukuteua tuyando tuendi, vakalila na kusikoka cikuma nguavo, 16 "Naana! Naana! Nganda yakama ije yazalele mu vintanga via liniu viacili, na via kuvenguluka, na viakuvenga, nakukosa ha viuma viakupanga ha ngolinde, na via mavue a seho, na vusanga vuaseho! 17 Mu ntsimbu imo lika vufuko vuoshe ovu vunahu."

Kaha vantuama voshe va mato na vaka kuendamo na vaka kujavula na voshe vaje vakele nakulandesela ha cisali, vemanene kulahako, 18 valilile cikuma omo vamuene vuisi vuakuuema cendi, vahandekele nguavo, "Nkuma nganda muka yasa kulieseka ngue eyi nganda yakama?" 19 Valishuuilile livu ha mitue yavo, omo valilile nakusikoka na kulila cikuma nguavo, "Naana! Naana! Muomu nganda eyi yakama ije voshe vaje vakele na mato akama ku cisali vafukile na vufuko vuendi! Mu ntsimbu imo lika vanaipihisa."

20 Jolela hali ikeye, yove melu, joleleni yeni vantu vakulela va Njambi na tunganda, na tunanguizi, muomu Njambi namihana kusompa hali ikeye!

21 Ambahoni kangelo ua nzili uambatele livue liakulifua ngue livue liakama liakulolela vunga nakuliumbila mu cisali nakuhandeka nguendi, "Omu mukemo Mbambilone nganda yakama vakaiuisa ha mavu na vutenu, kaha kuvakaiuana naua. 22 Mutambi uavakakuimba tulialia na vakakuimba vimbendo na matolombita, na vaka kuimba vitolombita kuva kayivuho naua! Naumo uahi muntu muka kupanga via mavoko via muyati uoshe akakalamo naua, kaha na mutambi ua livue liakulolela vunga kuvaka uvuho naua! 23 Kaha na ceke ca ndeya kucikatu muli yove naua, na lizi lia shombolua na vavenia vulo kuli kevuika muli yove naua, Muomu vakakulandesa vove vapuile vamala va nzili ha mavu, kaha uakuisile vantu voshe na mantseno ove a makuli."

24 Muli ikeye muakele maninga a tunanguizi na a vantu vakulela va Njambi na voshe vaje vavatsihile hano ha mavu.