1 Kaha cimueso cakama casholokele muilu. Kuakele mpuevo uje uazalele litangua, na ngonde ku viliato viendi, kaha ha mutue uendi hakele cilongo ca vintanga ntanga likumi na vivali. 2 Uemitile kaha uakele nakulila mushongo uakusema muomu uatondele kusema.

3 Ambahoni cimueso cikuavo casholokele muilu. Taleni, kuakele Canza ngombe uakuvenga uje uakele na mitue itanu na ivali na mambinga likumi, kaha ha mutue na mutue hakele cilongo. 4 Mukila uendi uakombele mutambela ua mucitatu ua vintanga ntanga na kuviumbila ha mavu. Kaha canza ngombe uemanene kulutue lua uje mpuevo uje uatondele kusema linga alie uje kakeke omo asemuka. 5 Uje mpuevo uasemene muana ua yala, uje akayula mafuti oshe na mbueti ya cikuvo. Vuno honi uje munendi vamutualele kuilu kuli Njambi ku litanda liendi. 6 Kaha uje mpuevo uateuelelele mu mpambo kuje kuakauanene cihela cije camuvuaheselele Njambi, kuje kuakamuniungila ha matangua akupua likulukazi limolika na vihita vivali na makumi atanu na limo lia matangua (1,260)

7 Kaha honi nzita yaputukile muilu. Mingeli na tungelo vendi valuisile canza ngombe, kaha na ikeye ualuile na tungelo vendi, 8 vuno honi uje canza ngombe vamuhianene kaha kakele na cihela naua muilu. 9 Kaha uje canza ngombe vamumbilile ha mavu, uje linoka ualaja, uje ivatumbula nguavo Liyavolo cipue Satana, uje mukakukuisa mavu oshe. Vamumbilile ha mavu hamolika na tungelo vendi.

10 Kaha njovuile lizi litambeka muilu ngualio, "Honi kuovoka na nzili na Vumuene vua Njambi yetu na nzili yakama ya Kilistu uendi vineja muomu uje muka kuvangeya vamuanetu vanamumbila ha mavu, uje muka kuvavangeya vutsiki na mutania kuli Njambi yetu. 11 Kaha vanamuhiana na maninga a Muna Mpanga na lizi lia vusunga lije livambuluile, muomu kuvazangele miono yavo cipue vene ha kutsa. 12 Nankuma vuahelela yove lilu na voshe vaje vakalamo! Vuno honi tuyando kuli mavu na cisali muomu Liyavolo neja kuli yeni mukuniengua cakama, muomu nazivuka nguendi ntsimbu yendi inapu yaindende."

13 Kaha honi omo uje canza ngombe uamuene nguendi vanamumbila ha mavu, kaha uakavele uje mpuevo uje uasemene muana ua yala. 14 Vuno honi uje mpuevo vamuhanene mambava avali a ngonga uakama linga ateue uje linoka nakupululukila mu mpambo, ku cihela kuje kuvaka muniungila ha miaka itatu na mbazuvuila ya muaka. 15 Uje canza ngombe uashanjele mema ngue livazi lia ndonga kukava uje mpuevo linga limukupule. 16 Vuno honi mavu ezile mukukuasa uje mpuevo, mavu ashokoluele kanua kauo kaha aminisile ije ndonga yashanjele uje canza ngombe. 17 Ambahoni uje canza ngombe uanienguelele uje mpuevo, kaha uayile nakulinga nzita na vana va uje mpuevo vaje vatulika mashiko a Njambi na kutulika vukaleho vua Yesu. 18 Kaha uje canza ngombe uemanene ha cikuma ca cisali.