1 Ambahoni njovuile lizi liakutambeka kuhuminina mu njivo ya Njambi lije lialekele tungelo vatanu na vavali ngualio, "Yeni muketile ha mavu malonga atanu na avali a vutenu vua Njambi."

2 Nankuma uje kangelo ua kulivanga uayile nakuitila lilonga liendi ha mavu, kaha vimbandu via kukomouesa nakuvavala cikuma viezile hali vamala vaje vakele na cimueso ca uje cikashama nakulemesa cifua cendi.

3 Kangelo ua mucivali uetilile lilonga liendi mu cisali, kaha cije cisali catengulukile kupua ngue maninga a muntu uakutsa, kaha coshe ca kuyoya mu cisali catsile.

4 Kangelo ua mucitatu uetilile lilonga liendi mu vindonga na mu mavuelu vuelu, kaha viahimpukile kupua maninga. 5 Kaha njovuile kangelo uje muka kuendesa mema ahandeka nguendi, "Unasompo muavusunga, yove uliko kaha naua yove uakeleko, Yove Uakulela. 6 Muomu vantu vanetila maninga a vantu vakulela va Njambi na tunanguizi, kaha unavahana maninga ngeci vanue. Muomu ca vapande!" 7 Kaha njovuile mutula uhandeka nguauo, "Yove, Muene Njambi Uanzili yoshe, ua vusunga na kusompa cove capua cakuhona civembulu!"

8 Kangelo ua mu ciuana uetilile lilonga liendi ha litangua, kaha valitavesele kuuemeka vantu na tuhia, 9 vantu va vatsimikile na ntuima yakukomouesa, kaha vasingile lizina lia Njambi uje uakele na nzili ha tuyando tuakama otu, kaha ku vatengulukile ku vipi viavo nakumuhana vumpau.

10 Kangelo ua mucitanu uetilile lilonga liendi ha litanda lia cikashama, kaha vumuene vuendi vuakele mu milima, vantu valishumangele vindaka viavo muomu yakuvavala cije vovuile, 11 kaha vasingile Njambi ua muilu muomu ya kuvavala cavo na vimbandu, vuno honi kuva tengulukile ku vilinga viavo.

12 Kangelo ua mucitanu naumo uetilile lilonga liendi mu ndonga yakama ya Yufuleti, kaha mema amuo omine, mukuvuahesa ngila ya vimiene vaje vakahuma mu ngangela. 13 Kaha njamuene mu kanua ka uje canza ngombe, na mukanua ka uje cikashama, na mukanua ka uje kananguizi ua makuli muahumine vimbembesi via kupihia vitatu viakufua ngue vinjunda, 14 muomu viapua vimbembesi via mahamba, kaha vikalingi vimueso vije vikai ku vimiene vaha mavu oshe, na kuvakungulula mukuli vuahesela nzita ya ha litangua lije liakama lia Njambi Uanzili yoshe.

15 "Taleni! Njija ngue muizi! uakukuisula uje atona, uje naniungu vuzalo vuendi linga keti aye kuakuhona vuzalo ngeci keti akashauke!"

16 Kaha vakunguluile vaje vimiene ku cihela cije vatumbuile mu Cihevelu nguavo Alamangindone.

17 Kangelo ua mucitanu na vavali uetilile lilonga liendi mu mpunzi, kaha lizi liakutambeka liahumine ku litanda mu Njivo ya Njambi liahandekele ngualio, "Calingiua!" 18 Kaha kuakele mihiato, na cililimo, na mikalateto na mandunduma akama ha mavu aje ku uakeleko hume havatangelele muntu hano ha mavu. 19 Ije nganda yakama ya litavuile lutatu, kaha vinganda via mafuti viauile, kaha Njambi uavulukile Mbambilone uakama, nakumunuisa nganja ya vutenu vuendi. 20 Vinkundu vioshe viateuele, kaha ku kuakele munkinda naua. 21 Mavue akama, aje alemene ngue peseleso ya cihita, auililile vantu kuhuma muilu, noho vantu vasingile Njambi ha kayando kakama ka kalunga ua civue, muomu kaje kayando kapuile kakama cikuma.