1 Kaha honi njamuene omo Muna Mpanga uashokoluele cimo ca tuje tusateso tutanu na tuvali, kaha njovuile umo ua tusitu vauana vakuyoya uahandekele na lizi lia kutambeka ngue cililimo nguendi, "Ija!" 2 Taleni! Njamuene kavalu ua kutoka. Uje ualondeleho uakele na vuta vua lungusa, kaha vamuhanene cilongo, kaha uayile ngue muka kuhiana mukuhiana.

3 Omo uashokoluele kasateso kamucivali, njovuile uamucivali ku tusitu vakuyoya ahandeka nguendi, "Ija!" 4 Kaha kuezile naua mukuavo kavalu, uje uapuile uakuvenga ngeengu. Uje ualondeleho vamuhanene nzili yakuhumisa ciyulo ha mavu, linga vantu valitsihe umo na mukuavo. Vamuhanene mukuale uakama.

5 Omo uje Muna Mpanga uashokoluele kasateso ka mucitatu, njovuile uamucitatu ku tusitu vakuyoya ahandeka nguendi, "Ija!" Kaha taleni, njamuene kavalu uakuzivala. Uje ualondeleho uakele na cipeseleso mu livoko liendi. 6 Kaha njovuile vije vialifuile ngue lizi hakati ka tusitu vakuyoya vauana lije liahandekele ngualio, "Lita ya tiliku inapu ngue fueto ya ha litangua, kaha malita atatu a mbale anapu fueto ya litangua. Vuno honi keti upihise mazi na viniu!"

7 Omo Muna Mpanga uashokoluele kasateso ka muciuana, njovuile lizi lia ua muciuana ku tusitu vakuyoya lihandeka ngualio, "Ija!" 8 Kaha taleni, njamuene kavalu uakutokoloka. Kaha lizina lia uje ualondeleho liapuile Kutsa, kaha na Vukalo vua vatsi vuamukavele. Vavahanene nzili ha mutambela umo ua mitambela iuana ya mavu, mukutsiha na mukuale, na njala yakama, na mishongo na vikashama va ha mavu.

9 Kaha omo uashokoluele kasateso ka mucitanu, muintsi lia mutula njamuene miono ya vaje vavatsihile muomu ya lizi lia Njambi na vukaleho vuje vuvatambuile. 10 Valilile kutambakana nguavo, "Muene Uanzili yoshe, uakulela na vusunga, nkuma ntsimbu muka honi ukasompa na kutonda maninga etu hali vaje vatutsihile ha mavu?" 11 Ambahoni umo na umo uavo vamuhanene kazaku kakutoka nakuvaleka nguavo linga vahuimeko lika kantsimbu noho vakuavo vangamba na vavushoko vavo vanahu, vaje vavatondele kutsiha ngue muvatsihile vakevo.

12 Omo Muna Mpanga uashokoluele kasateso ka mucitanu na kamo, njatalele, kaha taleni njamuene lindunduma liakama na litangua liazivalele ngue cikeleya cakuzivala, kaha na ngonde yoshe yavengele ngue maninga. 13 Kaha vintanga ntanga via muilu viauililile ha mavu, ngue muti ua mukuyu mu ukakukumuna vushuka vuauo vua mucisika omo vauningangesa ku mpunzi yakama. 14 Lilu liahumine ngue livulu liakuzenga lije livalinakuzenga, na minkinda yoshe na vinkundu va vihumisile mu mitambela yavio. 15 Ambahoni vimiene vahano ha mavu, na vaka kusuana, na vakuluntu va nzita, na vaka kufuka, na vakukolesa, na muntu uoshe, ndungo na muka kupatuka, valishuekele mu mena akucokola mu mavue na ku mavue akama aha minkinda. 16 Vahandekele ku minkinda na mavue akama nguavo, "Tuuileni na kutushueka ku cihanga cendi uje natumama ha litanda na ku vutenu vua Muna Mpanga! 17 Muomu litangua liakama lia vutenu vuavio lineja, nkuma iya asa kuimana?"