1 Ambahoni uanjimuesele ndonga ya mema a muono, yakuviakuma ngue kilisitale, yahumine ku litanda lia Njambi na kuli Muna Mpanga 2 yahitile mukati ka tapalo ya nganda. Kaha sinia na sinia lia ndonga kuakele muti ua muono uje uakele na vushuka likumi na vuvali, uakele na kuima ku ngonde na ngonde, kaha na maputa auo apuile vumbanda vuakukanguisa mafuti. 3 Kukukakala naua cimo cakusinga, vuno honi litanda lia Njambi na lia Muna Mpanga likakala mu likelio, na vangamba vendi vakamulemesa. 4 Vakamona cihanga cendi, kaha na lizina liendi likakala ha maholo avo. 5 Kukukakala naua vutsiki, kuvakatondoho naua ceke ca ndeya cipue litangua muomu Muene Njambi akapua ceke cavo kaha vakayula ya yaye.

6 Kaha kangelo uahandekele kuli yange nguendi, "Mezi aua anapu a kukonkama na vusunga. Kaha Muene Njambi ua vimbembesi via tunanguizi natumu kangelo kendi linga amuese va ngamba yendi vije vikasholoka vuavuno."

7 "Taleni! Njilinakuija vuavuno." Vakukuisula vaje vaniunga mezi a vunanguizi vua livulu eli.

8 Yange Yiuano, yange vene njovuile na kumona viuma evi. Kaha omo njaviuvuile na kuvimona, njauililile ku viliato via uje kangelo uje uanjimueselevio mukumulemesa. 9 Vuno honi uahandekele kuli yange nguendi, "Keti ucilinge eci! Muomu nange njinapu ngamba ngue yove na vamuanoko tunanguizi hamo na vaje vaniunga mezi a livulu eli. Lemesa Njambi!" 10 Kaha uahandekele kuli yange nguendi, "Keti usinkike aua mezi a vunanguizi a livulu eli, muomu ntsimbu ili muyehi. 11 Eceleni vaka kulinga vipi vatualeleleho kulinga vipi, na vaka kulinga via vuniengue vatualeleleho kulinga vuniengue, kaha na vaka kulinga via vusunga vatualeleleho kulinga vusunga, na vaka kulela vatualeleleho kulela."

12 "Taleni! Njili nakuija vuavuno, mukuneha vuana vuange mukufueta muntu na muntu ngue kuya kuvipangi viendi vianalingi. 13 Yange Alufa na Omenga, maputukilo na kukotokela, mbangelo na mamanusuilo.

14 "Vakukuisula vaje vakusha tuzaku tuavo, vakakala nakapandi ku muti ua muono nakukovela mu nganda kulikuasesa vikolo. 15 Vuno honi hambanza hali tutali na vaka mantseno, na vaka vupangala, na vaka kutsiha, na vaka kulemesa tumponia, na voshe vaje vazanga kulinga via makuli.

16 "Yange Yesu njinatumu kangelo kange kuli yeni na vukaleho ovu ku vikungulukilo. Yange Muzi na mutekuluila ua Ndaviti, ntanga ntanga yakuviakuma ya cimene."

17 Cimbembesi na Shombolua vahandeka nguavo, "Ija!" Kaha uoshe uje evua ahandeka nguendi "Ija." Kaha uoshe uje ali na mpuila eje, na uoshe uje a shunguiya atambule mema a muono cakuhona fueto.

18 Njinangula uoshe uje evua mezi a vunanguizi a livulu eli, nguange nga muntu a vuezelelako cuma cimo ku mezi aua, na Njambi a kamuvuezelela kuli ikeye tuyando tuakama tuje tuvanasoneka mu livulu eli, 19 nga kukakala umo a kahumisa ku mezi a mu livulu eli lia vunanguizi, Njambi a kamunieka mbazuvuila yendi ya ku muti ua muono na ya mu nganda ya kulela vije vivanasoneka mu livulu eli.

20 Uje ahana vukaleho viuma evi nguendi, "Muavusunga vene njilinakuija vuavuno."

Ameni. Ija, Muene Yesu!

21 Kavumbi ka Muene Yesu kakale neni voshe vantu vakulela va Njambi. Ameni.