1 Kangelo ua mucitanu uasikile tolombita yendi, kaha njamuene ntanga ntanga kuhuminina muilu nakuuila ha mavu, kaha vamuhanene sapi ya cina cakuhona masima. 2 Kaha uashokoluele cina ca kuhona masima, kaha ku cina kuahumine vuisi vuakulifua ngue vuisi vua ha lihando, kaha litangua na mpunzi va vizivalesele ku vuisi vuje vuahumine muje mu cina cakuhona masima. 3 Ambahoni muje mu vuisi muahumine vambimba nakuija hano ha mavu, kaha navakevo vavahanene nzili imo ngue ya manieue vaha mavu. 4 Vavalekele nguavo keti vakapihise muila ua ha mavu cipue cuma coshe ca vuntsompo ca kusoka cipue muti, vuno honi lika vantu vaje kuvesi na kasateso ka Njambi ha maholo avo. 5 Vaje vambimba vavatavesele kuyandesa vaje vantu ha vingonde vitanu, vuno honi kuvavatavesele ku vatsiha. Kaha kayando kavo kavavalele cikuma ngue vusungu vua linieue omo nga natuvu muntu. 6 Mu matangua aje vantu vakasetela kutsa vuno honi kuvakaciuana, vakatonda kutsa, kaha kutsa cikateua kuli vakevo.

7 Vaje vambimba vasholokele ngue tuvalu vaje vanalivuahesela kulua, ha mitue yavo hakele vimo viakulifua ngue vilongo via ngolinde, na vihanga viavo viafuile ngue vihanga via vantu. 8 Vinkambu viavo viafuile ngue vinkambu via vampuevo, kaha na mazo avo afuile ngue mazo a ndumba. 9 Mivila yavo vayifuikile na mavanda akulifua ngue vintelo via vikuvo, kaha na cililimo ca mambava avo cafuile ngue kalua ka tuvalu vavengi vaje vashatuka na matemba kuya ku nzita. 10 Vakele na mikila ya mambimbo ngue a manieue, kaha ku mikila yavo kukeko kuakala nzili ya kuvulumuna vantu ha vingonde vitanu. 11 Vali na muene hakati kavo ikeye kangelo ua cina cakuhona masima. Lizina liendi mu Cihevelu ikeye Ambandoni, kaha mu Cingelengu ikeye vamutumbula nguavo Apolioni (kulumbuna ngeci ikeye Muka kupihisa)

12 Kayando kakulivanga kanahiti, kaha taleni tuyando tuvali tukuavo naua tucilinakuija hanima yevi viuma.

13 Ambahoni kangelo ua mucitanu na umo uasikile tolombita yendi, kaha njovuile lizi kuhuminina ku mambinga auana a mutula ua ngolinde kulutue lua Njambi. 14 Lije lizi liahandekele kuli uje kangelo ua mucitanu na umo uje uakele na tolombita ngualio, "Zitula tungelo vauana vaje vavanakutu kuje ku ndonga yakama ya Yufuleti." 15 Nankuma vaje tungelo vauana vavazituile, vaje vavavuahesele laja ha ntsimbu ino vene, na litangua lino, na ngonde ino na ku muaka uno mukutsiha mutambela ua mucitatu ua vantu. 16 Vuingi vua masualale va ha tuvalu vaku kavali vapuile 200,000,000. 17 Kaha omu mukemuo munjamuene vaje tuvalu mu cimona cange: kaha vaje valondeleho vazalele vintelo via muyati uakulifua ngue tuhia na safile, na sulufa. Kaha na mitue ya vaje tuvalu yafuile ngue mitue ya vandumba, kaha na mutunua tuavo muahumine tuhia na vuisi na sulufa. 18 Kaha tuyando tuakama tutatu tuje tuahumine mutunua tuavo tua tuhia, vuisi na sulufa tuatsihile mutambela ua mucitatu ua vantu. 19 Muomu nzili ya tuvalu yakala mutunua tuavo naku mikila yavo. Mikila yavo yafua ngue manoka vali na mitue, kaha ikeyo ivakalikuasesa mukuvulumuna. 20 Vantu voshe vaje vasaleleho, vaje kuvatsile ku tuyando otu tuakama, ku vatengulukile ku vipangi via vipi cipue kulikela kulemesa mahamba na tumponia tua ngolinde, na siliva, na vunengu, na mavue na viti vije kuviasa kumona, cipue kuvua cipue kuenda. 21 Naua ku vatengulukile ku kutsihia cavo, cipue ku mantseno avo, cipue ku vukoyi vuavo, cipue ku vuizi vuavo.