1 Hangkiabe ne laisiu aide raupwa kedet kelube pui nah pe name, Ih kesangbe gade hungla kelame—nah Ih rünne ma, dede kesangbe de cikelu pelane de hung kelamedung dage kekai — 2 kesangbe anui lung ga kelade ziemne nah cide kelungta anui da lazie. 3 Peu Peibe Tinggwang nah Peibe Na, Jisu Khrista dade kegwang ngaugia, keku, nah lungciep de peu anuide bam kelube tei lulo, kesang nah keku gade.

4 N name kangge, anui Peibe dade aja ngau kelude nzwa kesangbe ga tetkela ngau eh Ih a sui yisüt lie. 5 Nah cu Ih n dade kiela mipuibo—n dage aja keheci ge raugai kecube ma, dede raitu gade anui ngau kelude—cide anui hangge gede kereku lulo kecu deda. 6 Nah keku aide au anui pe ajadung mzai eh tetlu maisia lie kecu deda. Aja aide nnui raitu gade siukelu nzwa, cide ga nnui tetla lulo kecu deda. 7 Kedanemene mide kecwamedung kekiee ge kideu ga la dida, penui Jisu Khrista au mina pumteih pung eh lungh gwang lie rangla ma. Aide au mide kecwame nah Khrista ngauraube. 8 Anui heta tei kegaide peu kapti melu kerane dede nnui ziehi ngau cangsiaklu kerane nnui mriak lulo. 9 Mina keheibede ntwa tetdi eh Khrista keledeu ga bamlu tadicai Tinggwang peda la meda.* Keledeu dega bam kelube, aipaude Peibe de nah Nabe de peda la. 10 Keheibe de keledeu sam aide teu mene nnuida gwang cai, pecu nnui ki ga ngngwa gwang so nah pe dage, "Kelum gaila," de kecu rang so. 11 Kedanemene pe dade, "Kelum gaila," de rang kecube de pe bata kesiadung de ga ncüt lalu.

12 Nnui dage ma kekiee raugai kera bam, dede Ih laisiu nah keraudui le rangneu ma. Kedanemene, Ih nnuida gwang kezungau eh mpau kera regui bam, iciu eh anui suiyi canglu kerane.✝ 13 Kedetkelu n sinapui namedung ncu kelum gaila.