1 Hangkiabe ne laisiu aide raupwa, keku Gaius, Ih kesang gade hungkelabe dage kekai.

2 Kehung azangbo, n rabe kilam yi kebam nzwa, maleune gade peu yilu kerane nah pumteih yimcang bam kerane Ih kie gaila. 3 Kedanemene nang kesangbe ga tetkela nzwa, sinamedung gwang eh nang kesangbe ga kela ha zierang tei kegai dau, Ih a suiyi süt lie. 4 Ih a namedung kesangbe ga tetla lie kecu siu kecu swa Ih a sui yiki kecu gahlie.

5 Kehung azangbo, nang anui zangme kenlumme ziemne heta ketei ga masang lie, penui au sangme liede, 6 penui n keku zierang de ngqwabe dwa gade ranggai da. Nang penuide Tinggwang dwade petaube tei eh penui beuh ga tet jüja gwanglu kera ngha lo, 7 kedanemene penui Gentileme dade kengha gede teu mene pe zi ziemne tetpet di delu. 8 Ciziemne anui cikenzwamedung de au ngha kerabe, ciciu eh anui kesangbe ga ngngwa heta keteime teilu kerane.

9 Ih madungge raupwa ngqwabe dage kaigai, dede Diotrephes, penui muiteu tei keneube, anuide ngngwa luma. 10 Aide ziemne, Ih kegwang dau, pe tadung pa tei kebam de pie kera Ih qu gaizie—anuide sam kesiabe le kemmaudung de. Dede ma aidungde le nnung mene, pa sinamedung de ngngwa luma, nah pa penuide ngngwa luneu kelame de de kaam dila delwe penuide ngqwaki gade de gwagi dila. 11 Kehung azangbo, kesiabe reli so, dede keyibe reli lu. Keyi tei kelabe au Tinggwang dade gwang; kesia tei kelabe au Tinggwang de ngau ma. 12 Demetrius ha mileune ne nah kesangbe ne de zierang teigai. Nah anuide pe zierang tei gaila nah anui zierang de kesang lie kecu nang cibam.

13 Ih ma kekiee ge n dage raugai kera bam, dede Ih cidungde keraudui nah kerautie le raugai neuma. 14 Dede Ih ncu zette kerengau kera regui bam, nah anai kezu ngau eh kempau zie.✝ 15 Peu lungciep nda bam kelube tei lulo. Zangnamedung ncu kelum gaila. Zangnamedung hangge ge kecu de kelum gailo.