1 Jude, Jisu Khrista kilabe nah James sinabe ne raupwa, Peibe Tinggwang keku ga kelame nah Jisu Khrista dage kaikelume dage kekai. 2 Peu ngaugia, lungciep nah keku nnuida bam kieesüt kelube tei lulo.

3 Akumedung, Ih nnui dage anui kelikelu hade laikai tei eh raugai kera ketei dau, Ih Tinggwang pe kemcime de piage gage kenlum kepeu de renia lulo nnuide kecung nah raugai maisiadi. 4 Kedanemene mina kangge nnui kakga ngkim eh jaulüt bam dida, penuide kemmau ndaage de Kesanglaisiu gage raupwa kebamme, mci kemakme, anui Tinggwang ngaugia de tei keli pwa kemmha ta tei kelame, nah anui Mpaube nah Rampaube ket rünne kecu Jisu Khrista de mlai la.

5 Nnui aidungde pelane cibam liede, Ih nnuide Jisu* dainzwa mina de Egypt deudi gade kelibeu, dede pecai nlum kemakme de ngkapdi bi kecu rang nsung gai neula.✝ 6 Nah tinggimgwame penui kengkieng kebam ni dega bam mene penui bam de gidi eh Tinggwang penuide muiting kecu ga kelungta bamkela geuria gage kang dida, tingba kedi benai tutiak ziemne. 7 Cinzwa eh Sodom penai Gomorrah nah cipau kenade de twagwa kebam namdidung de kemmha ta teidi nah pumteih lungningbe leune tei ladi. Penui kelungta kebam mi gade saja ngau eh keherei kecu liagai da.✝ 8 Cinzwa eh, mina aidungde penui mangle de pumteih tei hera nah Tinggwang kengkieng de mlai, nah kemcimedung de de rangmsia lala. 9 Dede Michael tinggimgwabe kedibe, Moses paau ziemne herakesiabe de ngngwa kesamlim nah repia kecu dau, pa pecu sam kesiadung teu mmau raudi. Meliene pa rangdi, "Peu Rampaube de ncu kesiu lu!" 10 Dede mina aipaudung de penui ci kemakbe leune de rangmsia lala, nah penui lungcet gade penui renaam kaunedung nzwa kela dene penuide ngkap dila. 11 Ainie penui da keherei gwang zieda! Kedanemene penui Cain lampui pwala nah kemmi ngaulu keneu ziemne Balaam kemmau ta ga ncütla, nah Korah nzwa kecamlai kecu gade penuide ngkap dida.✝ 12 Mina aidungde keheramedung ngngam mezing eh nnui kereku taktyei ga ngngwa matyei kebamme da— meurün kekwame penui katei penuipok rünne tei kelame nzwa. Penui au tingkaidung ne guipung kela tingrui sikemak hemwadung da. Penui au herei tingdau tsingbang petsi buila kemakpe nzwa da, nah piana tsaidi eh pe mah pai kedibe nzwa da,✝ 13 penui au jaaidi ga dui nswak kechidung nzwa da, penui ngngam bata dui nswak kecu nzwa keulia eh. Penui au hui bam kela hegidung nzwa da, penui ziemne muiting kecu kecok nige kelungta ziemne mtei pwa bam.✝ 14 Enoch, Adam gade lungh kenghung ceheu pe henabe, mina aidungde ha caihakecisam ranggai, "Ainie! Rampaube au pe kemcime cang cang de ngngwa lwe gwang lada,✝ 15 mileune tutiak kerane, nah penui bata kesiadung penui petau kemak gade ketei leune ziemne, nah mcikemak kemaume sam kesia leune Tinggwang de rang mmau kecu ziemne kesiu kerane." 16 Aidungde au ncam kelame, mide mmau kelame, penui kesia tei neu keladung nzui kelame nah penui muidung le mide rangmsia kelame, nah penui lampui peei lu kerane mide rangmsia kelame.

17 Dede nnui, akumedung, anui Rampaube Jisu Khrista ne langkegaime ndaa rang kebeu samdungde nsung lulo, 18 penui nnui dage, "Peting kekamle gwang de mide cwakelame penuikatei penui lungning kesiabe nzui kelame bam dizie."✝ 19 Mina aidungde ne mina de teupang lala, kideube zaireli ga lungh la nah Tinggwang Rabe penuida lama. 20 Dede nnui, akumedung, nnuide nnui kenlum mcitube gade teingkienglu, nah Kemci Rabe gade kekie teilu. 21 Nnui Tinggwang keku de ga bamlu, anui Rampaube Jisu Khrista ngaugia, kelungta kering nnuide peu kerade kwa eh. 22 Lunghau kelame de ngaunggia lu; 23 dede kedame de mi gade penuide teumpet eh kelilu; nah kedame de ngngi eh ngaunggialu, dede paini pumteih lungning le teihera kedi de ngkau lu.

24 Cu nnui kaudi kara gade nnuide kaizeulu kebuibe nah nnuide peu kemau gah nah nnui suiyi süt eh pe kendu dwa ga saplu kebuibe, 25 anui Rampaube Jisu Khrista gade anuide kelikelube Tinggwang rünne kecube de peu gwang kedi ting pelane ga, nah cude, nah kelungta ndu, heci, di, nah ngkieng, kelube tei lulo. Amen!