1 N mraipei daiga miedi no,

mipuime kakgade hezu yitube poe?

Mraipei dai lambie miedi no,

anui ncu ngngwa pecu peei beu kerane?

2 A kubepei pe gurie ga hungdi,

mosala luhdung ga,

hegurie ga pe kauhau de peu matyei kera nah teizuine pa hekwa kerane.

3 Ih au a kubepei gu, nah pa au agu;

pa neungga eh pe kauhau de teizuine padung kakga peu matyei la.

4 Nang au Tirzah nzwa hezuyi, a kubepoe,

Jerusalem nzwa hezuyi,

reugwame penui pailim teu kelame nzwa herüt pung kela.

5 N miak de a dade nreu di lulo,

kedanemene ci kena de a ziemne ngking dida.

N peutam au hemeu haudung nzwa da

Gilead deutu gade nghung kela nzwa.

6 N geidung au meurün puidung nzwa da,

hui kecu ni gade nghang kela nzwa da.

Peciakne de nedui ge bam,

nah penui kakga gah de di ma.

7 N biadung au kuraletsi pempie ge nzwa

n peuzui cai gade.

8 Cika hegwangpuidung riakherok bam, nauseupui riakheset,

nah releime peei kap gai kelak ge bam.

9 A tamhau, a kemcipui, pa rünne delie;

pa au pe pui na pumli;

pe pui ne nna kelu gade pe pui suitube.

Releimedung pecu ngau nah pecu samlam kepung puige lie qu di;

hegwangpuidung nah nauseupuidung de pecu ngau, nah pecu twadi:

10 "Tingcang nzwa kecu aide cauno,

hekei nzwa hezukeyi,

tingnaimiak nzwa baa,

reugwame penui pailim teu kelame nzwa herüt pung kela?"

11 Matsibangdung ziu kakga Ih nghung

langkam ga mabang keceunadung lungh kepet de pie kerane,

kubebang penei keheci bwa mi bwapet mebi pie kerane,

nah kuraletsi bangdung pa mi pa mebi pie kerane.

12 Ih a sui sütti eh

Ih hegwang napei bagi reuga tet kela nzwa di.

13 Ncai nreu lu, ncai nreu lu, yi cangsiak kecube poe;

ncai nreu lu, ncai nreu lu iciu eh anui ncu pieling gailu kerane.

Nnui daitei yi cangsiak kecube pui de pieling eh bam no,

reugwame hemaa kena helim lim kebam nzwa?