1 Leidung kak gade lei yitubedung, Solomon gu leidung.✝

2 Oh, pe mui kehemamdung le pwa acu hemam gailo,

n keku au zau swa yiki.

3 N keheniak ca perim kehengui keyi bam;

n zi au lwabam kela marim kehengui nzwa,

cine releime ncu mrai bam.

4 Nang acu ngngwa lu, delwe anai ngngwa pak dizie.

Hegwangpei acu pe bungdung ga ngngwa gwanglu.

Anai suiyi eh bam; n ziemne anai suiyi bam;

anai n keku dele renga gai go; cide au zau swa yiki.

Mipui kedadung ncu penui sui kera cide au pezai da.

5 Ih au remang dede hezuyi,

nnui Jerusalem napuimedung,

Kedar paikidung nzwa remang,

Solomon kehezu paidung nzwa hezuyi.

6 Ih remang kecune acu pieling eh bam so,

kedanemene tingnaimiak ne acu pu di delu.

A pui napeimedung acu penui rata di;

penui acu kubeluhdung ga peu kekwabe tei,

dede a katei a kubeluh be pielu tadi.

7 Acu ranglia lo, a kubepei,

n kauhau de peu daigade matyei lano?

N kauhau de tingna tingding dau daiga peu mtak lano?

Daitei Ih mige

n zangmedung kauhau taigai hui pwa la kecume ge nzwa laino?

8 Mipuime kakgade hezu yitube pui, nang ci mecai,

a kauhaudung cai pwalu,

nah n meudung de meurünkekwame paikidung taiga peu cehei peei tyeilu.

9 Ih ncu keu keda gai, a mraipui,

Pharaoh bagi kwendung kakga hekwenpui ge da.✝

10 N biadung hezukeyi netdung de ziemne ngau yisüt,

nah n nggwang jewel* riadung nzu mie kebam.

11 N ziemne kecak hezukeyi netdung teibeu zie

rangkanggeu netdung de si eh.

12 Hegwangpei pe zeu ga zeu kebam dau,

a rim kehengui ca gade perim keyi mpet.

13 A kubepei au a ziemne myrrh dum ge nzwa

tingmui a hekakrak reuga zeu kebam.

14 A kubepei au mapadung peu hena nzwa da

En Gedi kubeluhdung ga kebamdung de nzwa.

15 Kingneilu, nang au hezuyi, a kubepoi;

kingneilu, nang au hezuyi;

n miakdung au tamhaudung nzwa.

16 Kingneilu, nang au hezuyi, a kubepei, daikenzwa gede hezuyi no.

Cehei kerenudung de anai zeu da.

17 Anai ki hesumdung au cedardung;

anai gu kipaikang au firdung.