1 Nang hena kebam dau ncu dam kegaibe de nsunglu,

keherei kecu tingbadung gwangdi kemak dwa ge,

nah cipau tingkumdung gwang di eh,

"Ih aidung de ga lung kehega meda," de nang rangdi kemak dwa,

2 ma aidung de teilu hekei nah hegidung nah tingnaimiak pe kebaa gah di eh mui di kemak dwa,

iciu eh tingrui caiga hemwa kemui caili gwang di kemak dwa.

3 Cipau tingdau au reketmedung mbeu dizie,

nah mipei kengkiengme keukei dizie,

nah mipuidung maniak kelame mtak dizie kedanemene penui hekang cam dizie kecune,

nah kikam gade pie mpet kelame penui ma ngau mcilu tadi zie.

4 Cipau tingdau puidiki ga kikamdung ngkui dizie,

nah maniak kebam kwa mtak dizie,

cidau nruine kwa ne mipeidung de tei mrak dizie,

nah releime lei tei kela kwa gah dizie.

5 Cipau tingdau mipeidung heni kecehudung de hing dizie

nah puidiki ga kengngi kekieege bam dizie,

nah almond bang pepa pah kecudau,

nah tangriem penui katei penui de teu kereei kedidau,

nah nang n luilung gade tei keneube teilu tadi kecudau.

Minabe kelungta peki kemtak ni ga gwang di

nah mina puidikidung ga hei eh hap eh tet nghung zie. *

6 Ncu dam kegaibe de nsung lu

rangkanggeu ria cak di kemak dwa ge,

mede kecak kwakgwa pang di kemak dwa,

mede duilet ga duibung popdi kemak dwa,

mede tekwa ga heria cakdi kemak dwa,

7 kideu gade gwang kela rebui kideu ga caili gwangdi kemak dwa,

nah Tinggwang ne pwapeu kebeu rabe Tinggwang da caili gwang di kemak dwa.

8 "Mwangrim ge kenzwa da," keledeube rangzeu, "Maleune de mwangzui ge nzwa gah di zeu."

9 Keledeube au maci nah pa minadung de maci ledeu beu la. Pa cide pekeyi pekesia peei luda iciu eh macisamdung kekiee ge perehi gage mtei gai di. 10 Keledeube pe samdung mcihegi, kesamsang nah kesangbe teu eh rau kera peei luda.

11 Makecime samdung au kauruine lampui sau kela tuiting ge nzwa da. Makecime ne ledeu kelu samdung hekwa kelu au gojal gia ntipbing kelube nzwa da, Meurün kekwabe hangge ne ledeu kebeu.* 12 A na, nang mage gade mriak si lu: laisiukwakdung raucang kelu penli gah, nah laisiu peei kie ham kecu n pum tei mnei dizie.

13 Maleune kingnei cangsiak kelu cai

cide tei cangsiak lu kerane,

nang n Tinggwang de hinglu nah pe aja kai kebeu pelane mzai lu,

kedanemene mina dage tei lulo kebeu au aide pekiene da.

14 Kedanemene bata tei kegai pelane ziemne Tinggwang ne tutiak teugwang zie,

ma ngkim kembai leune de si eh,

keyibe de kesiabe de. *