1 Mteu kelabe cau no?

Mi teilung ga teikela hadung caune ci no?

Mina da bam kedi maci cide ne pezu pung mbaa la,

nah iciu eh pezu tak kela de teili dila.

2 Hegwangpei sam mzai lulo Ih nnuide ranggai la, kedanemene nang samsang kera Tinggwang dwa gade sampet lu delu. 3 Pe dwa gade nreu zette tetdi kera cet so, nah kemaube lampwa eh sap so, kedanemene hegwangpei pa tei keneu leune tei kelane. 4 Hegwangpei pesamdung teu hegwang teila, cine caune pe dage, "Nang daitei zeu bi" de rang lubui no?

5 Hegwangpei gu aja mzai kelame keherei gade mria lula.

Helung mteu eh kelabe au daitei maisia bi nah daidau tei ziebi cilu la.

6 Maleune ziemne samli petausiakpe bamla nah tei caili kerating bamla,

kedanemene mina reidung au dizu kecune.

7 Pecia dai gwang zie bi migede cima.

Caune daipai gwang zie bi kecu pe dage rangbeu lu zie no?

8 Migede pekatei pe cuingi reu kengkieng gah iciu eh pe cuingi tei mtaklu kera, *

nah migede pekatei petsit tingba reu kengkieng bam ma.

Nah migede de hereu tei keladau reugwame gade keu mpetdi lama,

nah kesiabe baang tei kelame kesiabe ne pecu kelilu gailak.

9 Ih aidung pelane de cet caili gaida; Tingnaimiak kangga bata lie kela leune gage Ih alung kaigai da. Mige ne mi kedage de tei keherei eh pelung tei rezam gai kecuting de bam la. * 10 Cine mina pezai kesiame de hemaa mtei dwa gade kung kecu Ih ngauda. Penuide kemci nidung gade pwa gwang kung nah penui heta kesia tei kegai namdi gade minadung ne penuide hetwa peu kebam Ih ngauda. Aide de pekie kegah kemta ge.

11 Ma kemau tei kegai ziemne kemau ziehi teibeu zette tadi ge, cide kemau teikera gage mina mlung de teugai dila. 12 Kemaume ge kemau kesia ta pia haige tei eh teilung ketie ring eh lunghlu liede, Ih ci kebam au Tinggwang de herüt peu kelame, pe dwa ga sap delwe herüt pe dage keulia kelame be yiki. 13 Dede mina kesiame ziemne au cide pekeyi gede gah; pa pe teilung ketie gede bam lak. Pe tingba ziedung au tingkaumie ge nzwa zette gah dizie, kedanemene pa Tinggwang de rüt kemakne.

14 Mwangzui kemta pekie kegah keda ge bamsi reu, ma kedage kideu ga teikela ge. Makesangme da tei nah gwang kelabe kesia kemaume dade tei nah gwangla, nah kemau kesia keteime da tei nah gwang kelabe makesangme dade tei nah gwangla. Ih rangla, aide de kemta mwangzui ge da. 15 Cine Ih misuiyi eh bam kera rangbeu la, kedanemene tingnaimiak kangga mige tyei nah sak lwe pe suiyi eh kebambe swade magede keyi bam si ma. Tingnaimiak kangga pa pe tatei kela gade nah pe teilung tingbaziedung pelane gade Tinggwang ne kepeu mapeu suiyi cide pecu nzang lamui zie.

16 Ih kemteu cilu kerane alung kai kegaidau nah kideu ga bata, tingmui de nah tingna de mimiak de peu zipdi mene tei kelabedung cilu kerane cet kegaidau, 17 iciu eh Ih Tinggwang ne tei kegai tadung pelane de cetgai, nah tingnaimiak kangga bata tei kelabedung mina ne cicang gailak di. Mina ne pe laikai daikenzwa ge kai eh cide cilu kera tei liede, pa cidungde cicang nah ngaucang gailak. Kemteube pei pa cibam de eh nlum bam lubui, dede pa de cicang ma.