1 Sam aidungde Keledeube, David leuhme nah Jerusalem ga hegwangpei gu samdung. 2 Keledeube aide rangla.

"Mwangzui ge nzwa,

tingkai kenciep guirui ge kenzwa,

maleune gah dila, keteu gai kera kekieege püt diak gai.

3 Minadung tingnaimiak kanggade bata kehung tei kegai pelane gade dai ge gie luno?*

4 Ceheu ge tetdi,

nah ceheu kedage gwang dai, *

dede kideube au pelui pela kelungta bamla. *

5 Tingnaimiak cuhlu,

nah cide nlüt dai dila

nah kelwa eh cide cuh dai kera ni ga cailigwang dai dila.

6 Tingkai tingbangle ge guigai

nah tingtünle ge gui nrui gwang gaila,

cide pe lampui gade nrui eh bammuila

nah cailigwang dai la.

7 Hereuki pelane jaaidi gage lwa gaila,

dede jaaidi cide madaude puidi lama.

Hereukidung lwa mie kela ga,

cika lwagai dai dila.

8 Maleune de leu eh nnei dila,

nah migede cide rangkecai lia lu kera gah.

Mimiak ma ngau kegaidung dele nnunglu lama,

mede mikwen ma siu kegaidung dele nnunglu lama.

9 Daipai teigwang bi cide teidai zie,

nah dai dungge teidi debi, cide teidai zie.

Tingnaimiak kangga magede keheci gede gah.*

10 Ma keheibe ziemne de,

‘Pielo, aide ma keheci geda,’ de eh ranglu kera bamni?

Daidung ge bamdi debi, cide ndaa tingtie gade bam dida,

cide anui dwa tingtie ceheudung gade bam dida.

11 Ndaa tingdau tei kedibe migede nsung bam lama,

nah cipaucai ne tei kedibedung de

nah aipau cai teigwang kerabedung de

cidungde nsung bam kera gede nzwa ma."

12 Ih keledeume ge, nah Ih Jerusalem ga Israelme reu hegwangpei. 13 Ih maci teu eh tinggim kangga kebam maleune pie nah peei kera a lungcet petlu. Kepeei tah cide hetah kehung ge Tinggwang ne mina namedung de peu naang bam lu kera kaigai. 14 Ih tingnaimiak kang gade bata tei kela leune ngauda, nah pielo, cidungde pelane de mwangzui ge nah tingkai gede gwazui kelage nzwa da.

15 Kengkoibe de tei nzui dai gailak!

Gah kedibe de pei gailak! 16 Ih akatei acu rang eh, "Pielo, Jerusalem ga a dwa lungh kedimedung pelane swade kemteu Ih ngau kieeki luda. A lungcet gade kemteu nah maci kedi Ih ngau da." 17 Cine Ih kemteu, herakemie nah kemiedung cilu kerane a lungcet pet luda. Aide de tingkai gede gwazui kera mtei kegai ge nzwa kecu Ih cilu. 18 Kedanemene, kemteu kiee kebam ga lungrei de kiee la, nah maci kiee kelame, cipaume suisiet de kieeki.