1 Ih akatei acu ranggai, "Cu au gwanglu, Ih ncu suiyi le pwane kedak pie zie da. Cine suiyi teu kehega lu." Dede pielo, ma aide de bam tie kemak tingkai kenciep ge gwale ma. 2 Ih kenui ha ranggai, "Cide au kemie ge," nah kehega kecu ha de, "Cide daitei lubui bam no?" 3 Ih zau le pwane a lungsui suiyi teilu kera cet eh teigai. Ih kemie herak teu bamreu liede, kemteu le pwane a kecet de teuswa kera peu. Ih tinggim kangga minadung penui teilung tingba ziedung ga penui daipai tei de yi zie bi Ih cineu eh peei.* 4 Ih ma kedidung tei luda. Ih akatei a ziemne kidung tei luda nah kube luhdung de ling luda. 5 Ih akatei a ziemne heguriedung nah mtakbamdung teilu; Ih cikage matsibang ketsamtsam linglu da. 6 Ih hegung ga tsingbang lungh kebam bedung de dui hetau kerane tekwadung teilu. 7 Ih kilabaangme mipei nah mipui de luilu; kilabaangme a hegwangki gade mna kelube de bam. A dwa Jerusalem ga hegwang teigwang kedime leune swade agu makaune hau nah kauruine kieeki bam.* 8 Ih akatei a ziemne rangkanggeu nah kecakdung, hegwangme nah deuceudung gu mabamdung hekwalu. Ih akatei a ziemne lei keteime mipui de nah mipei de teugwanglu, mina namedung suiyi teilu kelame, nah nauseupui kekieege. 9 Cine Ih Jerusalem namdi ga a dwa kelungme leune swade diki nah mahei kieeki, nah a maci a da bam jüja bam.

10 A miak dai ngauneu labi,

Ih cidungde dade kezeudi ma.

Ih a mlung suiyi leune gade acu kezeudi ma,

kedanemene Ih a bata kehung leune ga a mlung suiyi bam kecune

nah kehega kelu suiyi le pwane a bata ziehi de kecune.

11 Iciu eh Ih a ba le teicang kelu batadung pelane piegai,

nah Ih heta tei kelubedung de piegai,

dede, maleune de mwangzui ge nah tingkai de gwazui kela ge nzwa.

Tingnaimiak kangga kebam cika magede kemmi gah.

12 Iciu eh Ih kemteu,

nah herakemie nah kemie ha nreu gwang cet gai.

Hegwangpei aipaude cai gwanglai kezeu hegwangpei daipai tei lubui zeureu no,

kedanemene cidungde tei ciak dide kecune?

13 Ge cu au Ih cilu zeuda

kemteu au kemie swade yiki lie kecu,

kebaa au kemui swade yiki kecu nzwa.

14 Makecibe au pa daiga tetla bi cila,

dede kemiebe au kemui ga tet lala,

ciuliede penui pelane da teigwang kera nsam zie kecu Ih cibam.

15 Pecai Ih mninggai,

"Kemieme da daipai tei bi,

cide a dage de teigwang zie.

Cine pe kentsam dai ge bam no Ih macisüt bam liede?"

Ih a lung gade samcaklu,

"Aide de mwangzui kenzwa ge gwale ma." *

16 Kedanemene makecibe pei de, kemiebe de nzwa, petingtie nsungla lama.

Gwang kera tingbaziedung gade maleune de peting ketie ge gade nsungta dizie.

Kemiebe de nzwa makecibe pei de tsai dizie.

17 Cine teilung aide Ih ngkaula kedanemene tingnaimiak kanggade bata tei kegai pelane de a ziemne au sia kecune. Aide au kedanemene maleune de mwangzui ge nah tingkai de gwazui kera riem kela ge nzwa kecune. 18 Ih tingnaimiak kanggade mata tei eh a bata teicang kelu pelane pwa a suiyi luma, kedanemene a cai lungh leu kerabe dage Ih cidungde püt diak gai bi dizie kecune. 19 Kedanemene caune cilu lai pa kemriakme ge ziemi kemieme ge ziebi kecu? Iciuliede Ih a bata nah a maci le teikelu pelane reu pane pempaube tei zie lu. Aide de mwangzui ge nzwa da. 20 Cine, Ih tingnaimiak kanggade a bata tei kelu leune reu gage a lung keherei cuh di. 21 Kedanemene mige kemteu, maci nah heciemkeyi teu eh mata tei bam lubui, dede pa pe da kebam pelane mige cide magede teigai kemak ge dage pütdiak gaibeu dizie kecune. Aide de mwangzui ge nzwa nah suisiet kedi ge. 22 Kedanemene mige tingnaimiak kanggade nrisüt eh pa mata tei nah pelung kai süt eh pe bata teicang kera tei kegai ziemne pa dai kemmi ge ngaulu di no? 23 Tingba ramsangne pe tahdung au keherei nah leu, cine pe rabe tingmui kemtak ngaulu ta dila. Aide de mwangzui ge nzwa da. 24 Mige ntaku eh tyei nah sak eh pe ziemne yi kerabe tahdung tei eh mnung kebambe swade magede keyi bam sima. Ma kesang aide Tinggwang ba gade kegwang Ih ngau da. 25 Kedanemene, cauge matyei lu lai mede cauge suiyi gede ngaulu lai no, a Tinggwang dade meliecai? 26 Kedanemene mi keheibe de pe suiyi teilu kelame, Tinggwang pecu kemteu, maci nah suiyi peula. Iciuliede, kemaume de au pa keu kehekwa nah keu kehebau tah tei kera peula, iciu eh pa cide Tinggwang suiyi tei kelabe de peu dilu kerane. Ma aide de mwangzui ge nzwa da nah tingkai de gwazui kera riem kela ge da.