1 Paul, Khrista Jisu ziemne hebaang teikelabe, nah anui sinabe Timothy ne raupwa, Philemon, anui hungkela zangnabe nah nzang eh heta teikelabe dage,* 2 nah kenlum gade anui tipui Apphia, nah anui ngngwa reugwa zangbe tei kelabe Archippus, nah n ki gade ngkwa bam kelame dage kekai. 3 Anui Peibe Tinggwang nah anui Rampaube Jisu Khrista dade lungciep nah ngaugia nnuida peu bam kelube tei lulo.

4 Ih a kekie gade ncu nsung eh a Tinggwang de twabam muila, 5 kedanemene kenlumme peciakne ziemne nah Rampaube Jisu da n keku nah n kenlum kebamde siu kelune. 6 A kekie au n kenlum mide kelia ga peu n laikai teineu, iciu eh anui Khrista gade kebam makeyi leune nang ci canglu kerane. 7 N keku de ziemne Ih a suiyi nah ziune kecu kiee sütlu, kedanemene sinabo, nang kemcimedung lung teiheci dai kebeune.

8 Ciziemne, Ih Khrista gade nang tei maikesiabe ncu tei lulo aja kailu kebui kekuu leune bam, 9 dede keku ziemne, Ih n dage kie gaila—Ih, Paul, kecingpei ge*, nah cude Khrista Jisu ziemne hebaang keteibe. 10 Kenlum gade Ih a na Onesimus ziemne n dage kiela, Ih hebaang tei keladau pe rabe kilam pei teilu. 11 Piage n ziemne pa kemta kauge, dede pa cu au n ziemne de nah a ziemne de teumaikesiame ge dida. 12 Ih pecu, a mlungbe de n dage lang cailidai gaila. 13 Ih pecu peu ada bam neu, ciu eh pa n keleu gade Ih samliakeyi de ziemne hebaang tei kebamdau acu nghalu kerane. 14 Dede Ih n sui ci mene magede tei neuma, iciu eh n ta keyi de maikesia ziemne mene neungga eh teilu kerane. 15 Kedanemene aide ziemne pa tingkakge n dade lamnadi au zie, iciu eh nang pecu kelungta ngngwa la dailu kerane, 16 hebaangme ge nzwa mene, dede hebaangme ge swade yiki eh—kehung sinabe ge tei eh, keraide a ziemne, dede pumteih lamde nah Rampaube kilamde n ziemne au ciswade yiki dida. 17 Cine, nang acu n zangbe lie eh luu lucai, nang acu ngngwalu kera nzwa pecu ngngwa lulo. 18 Dede pa n dage ma teimau pwa bamcai* mede n paudung pung lacai, cide a dade kie lulo. 19 Ih, Paul aide akatei a bale rau gaila. Ih ne cide ruidai beuzie—n teilung de agu lie kecu n dage rang meliede! 20 Yeo, sinabo, Rampaube gade a suiyi tei beulo; Khrista gade a lung tei ramcim gailo. 21 Nang a sam mzailu zieha de nlum eh Ih aide n dage raugaila, Ih kie kegaide swade nang kieeki eh tei beuzie kecu ci eh. 22 Dede ciciu kecu reude, a ziemne kibung ge mtei gailo, kedanemene n kekie tei pwapeu eh acu peu n da gwang dailu kera Ih keregui bamlu.

23 Epaphras, Khrista Jisu ziemne acu nzang eh hebaang keteibe, nnuide kelum gaila, 24 acu nzang heta tei kelame Mark, Aristarchus, Demas, nah Luke de ncu kelum gaila. 25 Anui Rampaube Jisu Khrista ngaugia depeu nnui rabe de ngngwala kelube tei lulo. Amen.