1 Ndaa Tinggwang caihakecimedung de teu eh pia kekiee ge nah lampui ketsamtsam gade anui paume dage ma rangla. 2 Dede cudau kekamlebie, Tinggwang pe Na dade anuide ma ranglia dida, pa ma pelane gum kera kedet kelube de. Pe dade, pa kideube de teilu. 3 Pa au Tinggwang kendu kebaabe nah pe rehi siakte kecube da. Pa pe sam kengkieng le ma pelane de teuncüt pwabam. Pa kemaudung ziemne teimci kedicai, pa kecehu ga Ngkiengtube ba zetle bamdi. 4 Pa tinggimgwame swade ngkieng gwadi,* pa penui zi swa yigwa kecu zi ge ngaukelu nzwa eh. 5 Kedanemene Tinggwang samgwame ge dade madauge de,

"Nang au a Na,

henai Ih n Pei dida"?

Mede,

"Ih pe Pei dizie da,

nah pa a Na dizie da," de eh rang ni?✝

6 Dede, Tinggwang pe neraibe de peu kideu ga lungh gwang keludau, pa ranggai, "Peu Tinggwang samgwame pelane de peu pecu reca lu."* 7 Pa tinggimgwame ha ainzwa rangla,

"Pa au pe samgwame de tingkai tei kebeube,

nah pe kilame de miheu tei kebeube."✝

8 Dede Tinggwang Nabe dage ainzwa rangla,

"Tinggwang, n hegwangbam au kelungta nah kelungta lazie.

N hegwangram tuitie de au kenzeu tuitie ge lie.

9 Nang kesamsang de kula nah kesia de ngkaula.

Ciziemne Tinggwang, n Tinggwang, suiyi maca dele

n zangme de swa ncu keniak kiee lu."✝

10 "Kendeu dau, Rampaubo, nang kideube damgai.

Tinggimdung au n batadung.*

11 Cidung pelane gah dizie*, dede nang au bam jüja zie.

Penui au painia ge nzwa sia dizie.

12 Painia ge nzwa nang cidungde kedip dizie,

nah cidungde painia ge nzwa kedi dizie.

Dede nang au lidi lama,

nah n teilung madau de penli di lama."✝

13 Dede Tinggwang samgwame ge de,

"A ba zetle bamlu

Ih n ngauraumedung de n pidau bam teilu kemaktane" de eh dai dau rang no?✝

14 Samgwame pelane hegwatei kera, nah kelikelu ngaulu kerame de pierengei kera langkegai rabedung meni?✝