1 Ciziemne, pe mtakbam ga lütlu kera sampet de kebam dauge anui ngngi lugo, maige nnui keheibe de cide ga gwangcanglu tadi lu builu. 2 Cine samliakeyi penuida ranglia kebeu nzwa anuide cinzwa ranglia beuda. Dede penui siukelu sam de penui ziemne ma kemmi gede ma, kedanemene penui cide kenlum gade siukegai leune de ngngwa ket teilu kemakne. 3 Kedanemene anui nlumkelume kemtakni cika lüt, pa rangkegai nzwa eh,

"Ih a lunghop gade sampetkegai nzwa,

Penui madaude a kemtakni ga nlüt lak."

Iciuliede, pe batadung au kideu tei kelu benai gade tei canglu. 4 Kedanemene kesanglaisiu ga pa lang hena ne benai ha rang gaida:

"Nah Tinggwang pe bata leune gade lang hena ne benai mtaklu." 5 Nah aipau samde gage ranggai dai,

"Penui madaude a mtakni ga nlüt lak."

6 Ciziemne, midungge cika nlütlu kera bamreu, nah pedwa samliakeyi de penui dage ranglia beu eh siu kelumedung nlütlu ma, kedanemene penui samzai tei kemakne. 7 "Henai" de cide qu kegai Tinggwang tingba ge riep dailu. Tingbazie kekiee ge cai, pa David dade ranggai, pedwa rangkedi nzwa,

"Henai nnui pe kwa siu lie cai,

nnui lung takdi so."✝

8 Kedanemene Joshua ne penuide kemtak peunzeu lie cai, Tinggwang tingba keda ge ha aipaucai de rangbam laklu.✝ 9 Cine Tinggwang minadung ziemne Sabbath mtak ge kainzeu pwabam reu. 10 Kedanemene Tinggwang mtakni ga nlüt kelu keheibe liede pe batadung gade mtaklu, Tinggwang pe bata gade mtak kelu nzwa.* 11 Ciziemne anui cipau kemtak de ga lütlu kerane laikai tei lugo, iciu eh migede samzai tei kemak cikenzwa ga kaudi melu kerane.✝ 12 Kedanemene Tinggwang sam au kering nah kengkieng bam nah kiengtie pemui lule ailam ketei swade yiki. Cide kuipwa teu lampak dila keringria nah rabe de, miking nah misiedung de, nah mikecet nah milung ga cet kebam ci lula.✝ 13 Damkegaidung magede Tinggwang dwade kebai kedi gah. Meliene, pe dage anui ta liagai kerabe dwade magede kebaidi gailak nah ma pelane ngau mcigi bam.

14 Ciziemne, Jisu Tinggwang Nabe, tinggim leune kahkegwangbe cingku kedibe anuida kebam ne, anui kenlum de ga kerak ntiprip bam lugo. 15 Kedanemene anui kemneidung ziemne ngaunggia gai kelakbe cingkupei kedibe anuida bam ma, dede ma pelane gade anuide nzwa kedei kecube ge bam, dede kemau tei ma. 16 Anui kuu eh ngaugia Tinggwang hegwangbam ga tetgai cugo, iciu eh anui ngaugia ngaulu kerane nah ngaugia peeilu eh anui teu maikesia tingdau nghalu kerane.