1 Samkakkelu keraibe de kereca ziemne nah kideu gu heni kemci ge ziemne hezaidung bam. 2 Recapaiki ge teilu. Keraibe bung ga, mitaubam, taktyeibam, nah tei mci kelu tangku bam, cide de kemci ni lie qula.✝ 3 Kehezu pai pe kenabe caiga kibung kedage bam, cide de kemci nidung kakgade mcitube lie qula.✝ 4 Cika marim kehengui keru ziemne kecak recabam ge bam. Samkakbung kecak le cumkelu bung gede bam. Cipau lungga manna kai kenzeu kecakbung de, Aaron tuitie penei bwapet kedide, nah samkakkelu tangtsu kwak de bam. 5 Samkakbung peuga cherubim kendu ne ratak tei kebeude gumpwa bam. Cipaude ha cu rangsiakte kera peting mereu.✝ 6 Ma aidungde mtei kelu cai, cingkumedung penui ta tei kerane paiki hegwabe bung ga lütbam muila.✝ 7 Dede kibung pe kenabe ga cingkupei kedibe rünne mmi ge gade piage lütla, nah pa pekatei pe ziemne nah pe minadung ci mene teimau keladung ziemne hejai teu mene reca tei lama. 8 Hegwabe paiki keraide kebamtane heni mcitube dega kelüt lampui ngaulu mereu lie de Kemci Rabe keulia gai. 9 Aide cudau ting rehi ge, cika mapeudungde nah ratakdung pwa kereca de le kerecame lung tei mnung gai kelak ge. 10 Cidungde au ketyei kesak, mide tei mci kela zaidung ge rünne, ma tei keheci dai kecu ting gwang cang kemak tane, mipumteibe ziemne riet teu kela hezaidung ge.

11 Dede Khrista au ma keyidung gwangkelu gu cingkupei kedibe tei eh gwang. Pa mina ba ne tei kemak paiki diki nah yiki kecu ga lwet, cide au kideu dam kelu gude ma.* 12 Pa piage gage pelane ziemne heni mcitube ga lüt dida, hemeu nah ketumnadung jai teu mene, dede pekatei pe jai le, kelungta rikelu ngau luda. 13 Kedanemene hemeu nah ketumseudung jai nah ketumna keru mimütdung mci kemakmedung reu gage kezin gai eh penui pumteih tei mcilu kerane penuide Tinggwang dage tei mcilu cai, 14 Khrista jai au daikenzwa gede yiki zieno? Pa kelungta Rabe gade mci cang eh kemau gah eh pekatei pecu pwa Tinggwang dage ratak teigai, ketsai tadung gade anui lungcet * teimci beu eh anui ringkela Tinggwang gwa teilu kerane. 15 Aipau kiede ziemne, Khrista au samkakkelu kehecibe ga hekak ketetbe da,* ciu eh qu kelumedung kelungta samkai kebeu de gumlu kera ngau luzie, kedanemene Khrista tsai kebeu gade samkakkelu keraibe kangga kelame kemau tei kedidung de de rilu delu. 16 Kedanemene samkakkelu ga pesam pet kegaibe tsai de gai maisia kedine. 17 Kedanemene pe sam pet kegaibe ring kebamtane cide magede ma, tsai kedicaine cide peta tei la. 18 Cine samkakkelu keraibe de hejai teu mene tei ma. 19 Kedanemene Moses mina pelane dage hezai ga aja pelane rang kebeu dau, pa ketumnadung nah hemeudung jai keulu, dui nah pai giereba nah hyssop teu eh laisiudum reu gage nah mina pelane de de kezinlwa.✝ 20 Ge Moses rangdi, "Aide Tinggwang ne nnuide aja kaikebeu Samkakkelu jai deda."✝ 21 Cide kesiakke, pa hejai pwa kereca paiki nah kereca dau teukela lidung pelane gage kezin lwagai.✝ 22 Hezaibe rehi gade, ma pelane de hejai le tei mcilu, nah hejai lwagai mai kemau gilu kera gede gah.✝

23 Ciziemne tinggim gu rengeidung de au aidungde le teu teimci maisiadi. Iciuliede, tinggim gudung au cidungde swa yiki kecu ratak teu tei mci maisia di. 24 Kedanemene Khrista au heba le teikelu heni mcitube ga lüt ma, cide au kesangbe rengei ge rünne. Meliene pa tinggim ga, anui ding tei eh Tinggwang dwaga lüt dida. 25 Cingku kedibe mmi ramsang pekatei hejai keda teulwe heni mcitube ga lütdai kela nzwa, Khrista cika pia kekiee ge lüt pecu kaipwa peudai kecu teima. 26 Iciu cai, pa kideu damkelu gade pia kekiee ge keherei bamzie. Dede cu au pa piage gage peting penli lebie pekatei pecu pwa ratak tei gai kemau keugilu kerane. 27 Mina de peu piage tsai eh pecai tutiak ga gwang kera riem kebeu nzwa,✝ 28 cide nzwa, Khrista de piage mina kekiee maudung gibeu zielie pe pum kaibeu, delwe pia pe kenabe gwang daizie, kemau ha ziemne ma, dede pecu regui eh kwa kebamme de kelilu kera ziemne.✝