1 Peu caihereiswacing kereku bam jüja lu. 2 Mide hegia kecude nsungta diso, kedanemene aide gade, midungge cimene tinggimgwame de hegialu dilu.✝ 3 Hebaangme de nsunglu,* nnui penuide ngngwa kebam nzwa cet eh. Mine teikeherei kelame de nsunglu, nnui penuide nzangbam kecu nzwa cet eh. 4 Mileune depeu laktak de herüt peulo, nah laktak zeu de peu mcilu, kedanemene Tinggwang mmha eh mci kemakme nah kemmhame tutiak zielu. 5 Rangkang kehegin gade n zaireli peu kwak bamlu. Nda kebambe dungde teumnung lu, kedanemene Tinggwang rangla, "Ih ncu madaude gi dilak, meliene Ih ncu madaude püt dilak."✝ 6 Cine anui kuu eh rang,

"Rampaube au acu kenghabe; Ih ngngi dilak.

Mina a dage daige tei lulai?"✝

7 Nnui kenlum muiteume de cetgailo, Tinggwang sam nnui dage rangkebeume dungde, nah penui tei kegai gade kepet de cetlu eh, penui kenlum de reli lu. 8 Jisu Khrista au nziene de, henai de, nah kelungta nzwa bamla.✝ 9 Keledeu ketsam tsam gage nnui mlung kai diso. Kedanemene n kengkieng au Tinggwang ngaugia gade gwangla, ketyeipok zaidung mnei kecu gade ma, cide au mnei kelamede de ngha lama. 10 Anui recabam ge bam cikade paiki ga mata keteime matyei kera pe nzeu gah. 11 Hezai kehegwabe kangga au, makaune jai kemaudung ziemne teitset kelube cingku kedibe ne kemci ni ga teulüt la, dede penui pumdung au paiki gwale ge ru dila. 12 Cine Jisu liede namdibe kirie gwale de keherei, pe jai gade minadung de teimci lu kerane. 13 Ciziemne anui ramzeuki gwale peda mie go, pa hengam keteide mzi lugo.✝ 14 Kedanemene anui aika bammui kela namdi gede gah. Meliene, anui au gwang kerabe de pie lalu. 15 Anui Khrista dade, Tinggwang dage ketwa ratak* pwapeu mui lugo, cide cai, misam gade pe zi hetwa peu kecu.✝ 16 Dede anui makeyi ketei nah kemazi kecude gi diso, kedanemene ratak cikenzwadung Tinggwang pesui lalu. 17 Nnui muiteume samzai teilu, nah penui kerangbe teilu, nnui keringriadung pie rengei kera penui ta da, Tinggwang ne penui tutiakbe teilai eh kecu nzwa. Nnui muiteumedung depeu penui suiyi eh aide tei kera pekie keyibe teilu, nah ncamdi mene, kedanemene cide nnui ziemne kemta ge dizie lu.

18 Anui ziemne kielu, kedanemene anui au anui kecet mcigi eh bamkecu ci bamda nah anui ma pelane ga petaube tei eh lungh kera teineu la. 19 Dede Ih kecung si gaila nnuide aide tei kerane, iciu eh Ih nnuida cailigwang zilu kerane.

20 Cu peu kezuyi Tinggwang,* meurün kekwa kedibe de ketsai gade kwakcuhdai kelube, anui Rampaube Jisu, kelungta samkakkelu jai gade, 21 nnuide ma keyi pelane gade mteilu pe lungningbe teilu kerane, anui lungga heta tei kebamde pe dwaga petaulu kera, Jisu Khrista gade, peu pecu kelungta mdu kelube tei lulo. Amen.

22 Sinamedung, kehecung sam duitu gade raukegaide ga lia gailo de, Ih nnuide kecung gaila, kedanemene Ih sam kieekemak nage gwale nnui dage raugai melu. 23 Anui sinabe Timothy de lungmpet kedi ci lulo, pa kelwa eh gwangcai Ih pecu ngngwa nnuide kerengau zie.

24 Nnui muiteume nah kemcime pelane de kelum gailo. Italy deudi ga kebamme nnuide kelum gaila.

25 Peu Tinggwang ngaugia nnui pelane da bamkelube tei lulo.