1 Zierang hemwa kedige anuide twagwapung eh anuida bam kecune, anui hepüt kerüt leune nah kangpwa kebam kemaudung keugi digo. Anui dwaga kebam hezu kemzude kaipwa kebamde lia eh pak lugo. 2 Anui Jisu de pie lugo, kenlum bangdwabe nah tei cangsiak beu kelabe de. Pe dwaga suiyibe kebamde ziemne, pa cross de lialu, hengam ketei cide sipei ma, nah Tinggwang hegwangbam zetlebie bam dida.✝ 3 Cine pe ha cet gailo, kemaume dade cauge lialu dibi ngaurau süt kecu pekatei renia eh, iciu eh peu nnuide nnui lung kehereidi melu kerane nah pütdi melu kerane.

4 Nnui kemau de ngngwa renia eh, hejai lwacu kecang tei mereu. 5 Nah nnui nsungta dida kecung kegaide ga pe namedung lie de nnuide qu kelade.

"A na, Rampaube ledeu kegaide cetnla diso,

mede pane nnuide ledeu kecudau leu diso."

6 Kedanemene Rampaube pa hung kelame de ledeu la,

nah pa pe na lie eh luu kelume leune de saja peula.

7 Nnui keherei aide liagwang kecudau, Tinggwang pe name de nzwa nnuide ledeu bamlie kecu nsunglu. Kedanemene pe pei ne ledeu kemak cau bamno? 8 Magade Tinggwang pe name leune de ledeu kela nzwa, nnuide ledeu mecai, ge nnui au hekaknadung dida nah pe name meda. 9 Cirünne mene, anuide ledeukela anui pumteihbe peidung bamlie nah anui penuide rütla. Anui rabedung Pei sam au mzai kieeki delwe lungh maisia meni? 10 Kedanemene kesang anui peime penui macet yitube teu anuide kaknage ziemne ledeu. Dede Tinggwang anui ziemne yi kerabe anuide ledeu la, iciu eh pe kemci ga anui mzilu kerane. 11 Cu kesangbe au ledeukecu tingdau ga misuiyi eh la lama, dede kehereila la. Pecaine cide gade keteukelu ziemne makesangbe tsi kenciep bui beula. 12 Cine nnui badung nzumie kebamde nah nnui kemnei ngkokdung de teingkieng lu.✝ 13 Nnui pi ziemne lampui kemzui teilu, iciude telwa kelade sia dilak dede yi luzie.✝

14 Mileune de ngngwa kezuyi lu, nah kemci cide simai migede Rampaube de ngau gailak. 15 Pielu peu mige dage de Tinggwang ngaugia gahdi melu kera, nah kekaa mah gede lunghcuh eh keherei teigai so, nah aide ne mina kekieege de tei heradi lubui.✝ 16 Pielu peu kemmha mede Esau nzwa rabe lam ncok kemak bam diso, tak kwakge ziemne pe kemna qwa zwatyei kedi. 17 Kedanemene nnui cibam pecaine de, Esau samlam de luuneu kedidau, pecu mlaidi, kedanemene pa pe miakdui zau eh cide peei liede, helungnreulu kera ziuyi pa ngaulu tadi.✝

18 Kedanemene nnui mage deulukebui da gwang melu, miheu kebaa, kemui, muiting kecu, nah rahang, 19 nah telui kwakecu dage, mede sam rangbam kecu makwa ge da siu kelumedung kiedi penui dage sam kedage de rang sita lulo eh. 20 Kedanemene aja kai kegaide penui lia gailak kedine: "Magade makaune gene de lamlwa tungcai, cide tangtsu le sam tsetdi maisia."✝ 21 Kengau aide hingzu kedine Moses rangdi, "Ih au ngngi nah mbeu dida."✝ 22 Meliene, nnui au Zion Deutu ga nah ringkela Tinggwang namdi ga gwang luda, tinggim Jerusalem, nah tinggimgwame pecang hengyi kebam ga, 23 nnui Tinggwang nerainadung zi tinggim ga rauteula kedi ngkwa ga gwang luda, nnui Tinggwang lie qu kelabe ma pelane reu hetutiak kelabe da gwang luda. Nnui tinggim ga teimci cangsiak kelu rabedung da gwang luda,✝ 24 nah hekak ketetbe, samkakkelu kehecibe teu kegwangbe Jisu da, nah Abel jai swa rang hemiki kecu hezin kegai jai deda. 25 Marang kebambe de nnui mlaidi melu kera mriak bamlu. Kedanemene magade Israelme paklu meliecai kideu ga penui dage rang kebeube de mlai kecudau, anui pak gailak lie magade tinggim gade anuide rangmriak kebeube Tinggwang dade anui nreutet dicai. 26 Ndaa piage, pe kwa ne kideu de kelai di. Dede cu pa sampetgai eh ranggai, "Piage si eh reu Ih kideube rünne mene, dede tinggim de de teukelai zie."✝ 27 Dede samdung aide, "Piage si eh reu," pekie be teukelai kedibe keugi di kera, cinzwa eh, teu kelailu kemakpe depeu bamlu kerane.✝ 28 Ciziemne, anui teu kelaigai kelak hegwangram *ngaulu zeu delu, anui twa lugo, nah Tinggwang luulu kebui zai teu anui recalu kera gade, herüt nah kengngi teu eh. 29 Kedanemene anui Tinggwang au teingkapdi kela mi ge lu.✝