1 Aide ziemne Melchizedek, Salem* gwangpei, cehutube Tinggwang cingkube, Abraham hegwangmedung de renialwe cailigwang keladau pecu redaulu delwe pecu samlambeu.✝ 2 Abraham pecu ma pelane zikerei zige pwapeu. Pe zi pekie au "kesamsang hegwangpei," nah pecai "Salem gwangpei," de da, cide pekie, "kezuyi gwangpei." 3 Pa au pe pei, pe pui, paupak ha gede gah, teilung tingbazie pe ndeube de gah mede pe teilung cangkedi ha de gah. Meliene, Tinggwang Nabe nzwa, pa kelungta cingkupei ge teibam di.

4 Dede mina aide daihia gede dibi pie gailo, heleuh peibe Abraham pe dage hereu ketei gade keu keludung pa zikerei zige pwa pecu peu. 5 Nah kesang Levi leuhmedung cidungde cingku teikelume Israelme dade zikerei zige keu hekwa kera hezaibe rehi gade aja ge kainzeu, cide penui sinamedung dade de keuzie, penui Abraham leuhme gade lunghgwang kelume ge liede.✝ 6 Melchizedek penui dade lungh kegwangme ge ma, dede Abraham dade zikerei zige luulu nah pecu samlam beu, Tinggwang samkai kebeu ngaukelube de. 7 Samlam kebeube au samlam luu kelube swa diki kecu mcigi bam. 8 Aipau ria gade liecai, tsaidi kelame ne zikerei zige de luula, dede cipau rehi gade liecai, Melchizedek ringla kelabe ne luula. 9 Nah, kerang zai gade liecai, Levi, zikerei zige luu kelabe de, Abraham dade zikerei zige Melchizedek de peudi delie lubui, 10 kedanemene, Abraham Melchizedek de redau kecu dau, Levi au pe paume pumga lareu.✝

11 Cine magade Levime cingkuta gade yicangsiak kecu ngau lula liecai (kedanemene cipau kang gade mina hezaibe ngau kelune), daitei eh Melchizedek pa pwa leu kera cingku kedage cika pet si laino, nah Aaron ria gade mene? 12 Kedanemene cingku keteime releu dige, hezaibe de teili maisiadi kecu teila. 13 Kedanemene cu pe ha rang kebambe de au heleuh kedage gade, cipau leuh gade migede madaude recabam ga hegwa teima. 14 Kedanemene, anui Rampaube au Judah leuh gade lunghgwang kecu cide mcigi da, cipau leuh de gade cingkume ha Moses kette rangnzeu ma.✝ 15 Nah aide au mci gwa dida, Melchizedek kenzwa cingku kedage cuhdai cai. 16 Pa pumteihbe zai gade ma, dede tei msiadi gaikelak teilung kengkieng gade cingkupei ge tei dida. 17 Kedanemene kesanglaisiu ga pe ha rangkenzeu au:

"Melchizedek pa pwa leu eh nang au kelungta cingkupei ge dida."✝

18 Hezai keraibe de keumpet ntsam dida kedanemene cide kemnei ge nah kemta ge kedi ziemne, 19 (kedanemene hezaibe magede tei hemi cangsiak beuma), nah keregui yigwa kecuge teugwang luda, iciu eh cika de anui Tinggwang da nna gwanglu da. 20 Nah aide sampet tei mene teigai ma! Kedanemene mi kedame au sampet tei mene cingkume teilu, 21 dede Jisu au sampet teilwe cingku ge teilu, kedanemene Tinggwang pe dage ranggai,

"Rampaube sampet tei luda nah pa pe lungnreu dilak:

‘Nang au kelungta cingku ge dida.’"✝

22 Cide kesiakge, Jisu samkak yiki kecuge teibi kera teibeu. 23 Cingku keraibedung au kekiee ge, kedanemene penuide ketsai ne kaamdi eh penui ta tei jüja bam luma. 24 Dede Jisu au kelungta lungh kela ziemne, pa au cingkupei tei eh bammui la. 25 Ciziemne pe dade Tinggwang da gwang kelume cipaume de pa kelilu bui, kedanemene pa penui ziemne kie kera ring bammui la.✝ 26 Cine cikenzwa cingkupei kedibe au anui ziemne zeutube kesang delie. Pa au kemcibe, kemau gah, mcigi, kemaume dade teu ntsam kelube, nah tinggimdung swade pa cehuki kecube dida. 27 Pa au cingkupei kedibe kedamedung nzwa tingba ramsangne, keraibe pemau ziemne nah pecaide mina mau ziemne, ratak tei maisia ma. Kedanemene pa pekatei pe pum kaibeu dau, pelane ziemne piage gage tei beudi delu.✝ 28 Moses zaibe gade au mina kemneimedung de cingkupei kedibedung tei kera kedet lula. Dede sampetkelu sam, hezaibe caine gwangkelu, Nabe de kedetlu, pecule pwa kelungta yicangsiak kelube teilu.