1 Cingku kedi keheibe de, mina kakgade kedet kelude au, mina mteina keleu tei eh Tinggwang ta tei kerane nlumbeu dida, iciu eh pa mapeudung pwapeu nah kemau ratakdung teilu kerane. 2 Pa maci kemakmedung nah cwateu kedimedung dade nciep lubui, kedanemene pa pekatei de mnei kebamne. 3 Aide ziemne, pa kemaudung ziemne ratak teime gailak di, pa mina ziemne ketei nzwa, pe ziemne de tei maisiadi.✝ 4 Migede hetwakepung Cingku kedibe tei kera pekatei kedet lama. Meliene, Tinggwang ne Aaron de qukelu nzwa pecu de qu kelube.✝ 5 Cide nzwa eh, Khrista de pekatei pecu cingku kedibe tei eh hetwa peu ma. Meliene, pecu resiu kebambe rangdi,

"Nang au a Na;

henai Ih n Pei dida."✝

6 Kesanglaisiu ga pesau kedadung gade de Tinggwang rangkegai nzwa,

"Melchizedek cai pwa eh

Nang au kelungta cingkume ge."

7 Jisu kideu ga kelungh dau, pa pe miakdui lwa nah sahbak eh kekie tei nah pe ngia teu delwe pecu ketsai gade kelilu kebuibe da gwang, nah pa au henah nah masang kecune pe kwa kingnei beu. 8 Pa au Tinggwang nabe liede, pa keherei kegai gade samzai teilu. 9 Pecu yicangsiak kelube teilu, nah keheibe de pe samzai tei kelume ziemne pa kelungta kelikelu lampuibe teidi.✝ 10 Tinggwang pecu peu Melchizedek pa pwa leu eh cingku kedibe tei kera nlumbeu dida.✝

11 Anui aide ga maha rangsüt kera bam, dede cide rang mcigai kera teipa lie, kedanemene nnui kingnei kecu ga mang kedine. 12 Ciziemne nnui aipau tingdau keledeume ge teiladi kerabe dida, dede nnuide au mikangge ne Tinggwang samdung pendeube gade nnui dage ledeu kerame ge teu maisia zeu reu. Nnui au taktyei kengkingbe meliene tungdui teu maisia kecume tei dida! 13 Kedanemene keheibe de tungdui rünne sak lacai pa au kesamsang sam de cicang mereu, kedanemene pa au hename ge zeureu kecune. 14 Dede taktyei kengkiengbe au kengkiengme ziemne, penui zai reli gade keyi nah kesia ci ntsamlu kebui keteu luda.