1 Cu kenlum au regui keladungde ngau bilu kera deda nah ngaula kemakdung de ci mci lu kera deda. 2 Kedanemene penui kenlumde ziemne ndaa anui paume hezi keyi ngaulu. 3 Anui kenlum gade Tinggwang samle kideu damlu dilie kecu ci lula, iciu eh anui cu kengaube au ngau kecudung gade teilu ma.✝ 4 Kenlum gade Abel au Cain swade ratak yiki kecu pwa Tinggwang de peu, cide gade pa masang lie kecu keulialu, nah pe mapeu ziemne Tinggwang pe keyi ha ranggai, nah pa tsaidi liede, kenlum gade pa cude zierang teibam.✝ 5 Kenlum gade Enoch de ngngwa nghangdi cine pa ketsai ngau ma. "Tinggwang pecu keuteu kedine, pecu ngaulu tadi." Kedanemene pecu ngngwa nghang kedidwa, pa Tinggwang suiyi teilu delie kecu zierang ngaulu.✝ 6 Kenlum si mene pe suiyi tei gailak. Kedanemene Tinggwang da kegwangme pa lunghla lie kecu nah pa au pecu peei kelame ziehi teibeu kelabe lie kecu nlumlu maisia. 7 Noah kenlum gade, Tinggwang ne mrai rangkebeu sam de ngau mereu liede, rabe de kerüt gade pe kilungme de kelilu kerane liem ge teilu. Aide ketei gade, pa kideube de mmaudi nah kenlum gade kegwang kesamsang mapwame ge teidi.✝ 8 Abraham kenlum gade, pecu qu kegai dau, samzai teilu nah peu gum zielie eh pa ngaululai eh kebam heni dega tetmie. Pa daiga mielabi kecu cimene, pa tetmie.✝ 9 Kenlum gade pa sampet kebeu deu ga sangme ge tei eh lungh. Pa paiki ga Isaac penai Jacob, sampet kebeu mapwabe kenade de ngngwa lungh. 10 Kedanemene pa au namdi bangdwabe, Tinggwang ne riem nah tei kegai de regui bam. 11 Kenlum gade, Sarah liede hena ge tetlaklu kebui kengkieng ngaulu, pa kecing sütdi liede, sampet kebeube de pa masang lie eh nlum kelune. 12 Ciziemne, aipau peide dade de, nah pa tsai nage di liede, ting ga hegidung kieege, nah jaaidikung ga heciang peikap gaikelak kieege heleuhdung lunghlu. 13 Mina aidung pelane sampet kebeude ngaulu mene kenlum gade tsai dida, meliene penuide kemdei gade piegai nah kelum kegai, nah penui au sangmedung lie kecu nah kideu ga penui ki kegahmedung lie rangdi. 14 Kedanemene sam cikenzwadung kerangme penui ki kesang ge peeila liekecu cide rang mcigai. 15 Magade penui tetkahmpet kedibe deudi hade penui mning daila kesang liecai, penui cailigwang dailu kera ziuyi de ngau luzie nage. 16 Dede cinzwa eh, penui deudi yiki kecuge hengin ladi, cide au, tinggim ram. Ciziemne Tinggwang au penui Tinggwang lie qu kecu ngngam dima, pa penui ziemne namdi ge mtei pwabam kedine. 17 Kenlum gade Abraham, pecu kedei kecudau, Isaac de ratak tei pwapeu. Sampet kebeudung pa ngau kelube liede pe na kepumlibe de pwapeu.✝ 18 Tinggwang pe dage ranggai, "Isaac dade n leuhmedung zi msiak zie."✝ 19 Abraham au Tinggwang Isaac de ketsai gade de kwakcuh dailu kera nlum, nah samgwa nzwa, pa cikade pecu ngau dailu. 20 Kenlum gade, pecaine gwang keradung ziemne de, Isaac ne Jacob nah Esau de samlam beu.✝ 21 Kenlum gade Jacob, pa tsaidi lai kecudau, Joseph napeidung ketket kecude samlambeu, nah pe tuitie reuga ngngeilwe, recagai. 22 Kenlum gade Joseph, pe teilungzie canggwang kecudau, Israel napeidung de Egypt gade ngngwampet kera rang nah pe radung keu eh teimai kesiadung penuide ranglia beu. 23 Kenlum gade Moses, pecu mna keludau, pe pui pe pei ne pecu keicum ge kebaidi kedanemene pa au hezukeyi hena nage kecu penai ngau kelune, nah penai au hegwangpei aja de hing tadi. 24 Kenlum gade Moses, pa ngkiengcuh kelucai, Pharaoh napui napei lie qukera raudi.✝ 25 Meliene, pa Tinggwang minadung de ngngwa keherei kecube kedetlu, kemau tei eh tingkakge kehega kecube swade. 26 Pa Egypt ga maheidung swade Khrista ziemne* ngngam kelube diki kecu cetlu. Kedanemene pa au pe ziehi gage pe miak kaiteu kelane. 27 Kenlum gade Moses Egypt pütdi. Pa hegwangpei rata de hing tadi, kedanemene pa ngau kemak Tinggwang de kengau nzwa eh pa lia kelune. 28 Kenlum gade pa Kahkegwangngyi de nah hejai kehezin de teilu, iciu eh neraibe de tei kengkapbe penuide deumelu kerane.✝ 29 Kenlum gade Israelme Jaaidi Kegie de deucangh deu nzwa eh tetkah mpetlu. Egyptmedung aide tei zielie tei kecudau, penuide kegak cetdi.✝ 30 Kenlum gade Jericho tsukwadung de kaumie di, Israelme lang henane tet twagwa kelu caine. 31 Kenlum gade helipui Rahab samzai tei kemakmedung de ngngwa tsai dima, kedanemene pa reketmedung de kezuyi gade ngngwa kelune. 32 Ih daipai rangsi lai? Kedanemene Ih Gideon, Barak, Samson, Jephthah, David nah Samuel de si eh nah caihakecimedung ha rang bamcai a ziemne peting gahdi zieda. 33 Kenlum gade penui hegwangramdung gwalu, kemzuibe teilu, nah sampetdung ngaulu. Penui hinghodung mui kaamlu, 34 miheu kengkieng teimmüt lu, tsaidilu kera gade paklu, teeineidung gade teingkeilu, hereu gade ngkienglu nah sangme reugwame de ngamlu. 35 Kenlum gade mipuidung penui kibaume tsaikedime de ngau dailu ketsai gade kwakcuh lu eh. Dede kedame dungde teikeherei, lungkempet de luuneu mene, iciu eh penui yiki kecuga ringcuh lu kerane. 36 Nah kedamedung de kedei eh henui tei nah dap, nah hegeuria le kang nah hebaang de tei. 37 Penuide tangtsu sam, penuide dumtüt kena teidi, penuide kedei, penuide kiengtie le bitset. Penui meurün nah hemeu geudung bah eh rwapwa, magede gah eh, mine mneu nah teikeherei. 38 Kideube penui ziemne yilu tadi. Penui kideu ketsaidung ga nah lamlwadung, nah tsupopdung ga nah hangdeu ketiet kidung ga huirwa ladi. 39 Mina aidung pelane penui kenlum ziemne hezi keyi ngaulu, dede penui Tinggwang sampet kebeude ngau luma. 40 Tinggwang anui ziemne ma yiki kecuge riem teula, iciu eh anuide si mene, penuide tei mmi cangsiak melu kerane.