1 Anui Khrista sam kenciep nabedung gidi eh kengkiengbe ga gwang cugo. Anui ketsai batadung gade helungkenreu nah Tinggwang de kenlum ha bangdwa kedage dwa dai bui ma, 2 duipum ha keledeu, heba hwa kegai ha, ketsaime ringcuh daikera ha, nah kelungta kemmau ha gede. 3 Aide anuide tei zie Tinggwang tei lulo beu cai. 4 Kedanemene piage kesangbe ha ci kelume ziemne au helung nreu dai kera au pazu dida, tinggim mapeu msi kedime nah Kemci Rabe de kemazi kedime, 5 nah Tinggwang sam keyi msi kedime nah gwang kera teilung kengkieng ha ci kelume, 6 dede penui kaudi cai, cipaume dungde de helungkenreu gage ngngwagwang gaidai kera au pazu dida. Kedanemene Tinggwang Nabe de penuikatei penui ziemne gwak nah pecu mteibe dwa gage hengam tei daidi delu. 7 Hangdeu tingrui kegaidau sak kelabe, nah hangdeu cide hetatah kegaibe ziemne mabangdung keyi lungbeu la kelabe, Tinggwang dade samlam ngau lula. 8 Dede hangdeu hetubangdung nah petu ketei heidung lungh kecube au pemi gah nah reset dilu kebui ge dida. Cide kekamle rudi kera da.✝

9 Dede kehungmedung, anui ainzwa rangbam liede, nnui ziemne makeyi bam kera anui nlum bam, kelikelu ngau kera de ga. 10 Kedanemene Tinggwang au petaukemak tei lama, nang n bata tei kegai nah pe zi ziemne keku keulia kegai, kemcime de nkwet kelu nah cude nkwet kebamdungde pa nsungta di lak. 11 Anui hengin kebam au nnui ket ket kecude peu nnui suiyi eh penli ga cang luneu, iciu eh nnui keregui peu bambilu kerane. 12 Aide ai nnuide peu nghetdi melu kerane, dede kenlum nah helungketie teu eh sampet keludung gum kelume nzwalu kerane.

13 Tinggwang Abraham dage samkai kebeu dau,* pa mi pe swa kedi kedage de teu sampet kera kegah ne, pa pekatei pecu teu sampet. 14 Pa rangdi, "Ih ncu samlambeu bizie, nah Ih n leuhme tei ngkiee beuzie."✝ 15 Ainzwa eh, Abraham pe lungtie eh lia lwe samkai kebeude pa ngaulu. 16 Mina pekatei peswa diki kecume ge de teu sampet la. Penui kakga kehebwak de au, sampet kelude ne ma tei mdui lula.✝ 17 Tinggwang samkai kebeude ngaulu kerame dage pa riemteu kelade madauge de pe lungningbe li dilak lie rang mci lia kera cet keludau, pa cide teibi kera sampetgai si beu. 18 Cine Tinggwang pe sam kaibeu nah sampet de gaibeu da. Makie kena aide lidi lama kedanemene Tinggwang au mret dila melu. Ciziemne, anui pe dage msiu kerane pakgai kelume, anui dwaga kebam keregui de kerak ntip bamlu kera tei ngkuu süt gai.✝ 19 Anui keregui kebam aide au keringria ziemne ntip nah nlumlu kebui liemgeukang kenzwa ge, cide tiggim ga kerecaki pailim helungle de lütlu kelabe,✝ 20 cika Jisu, anui dwa gwang kedibe, anui keleu tei delwe heni cide ga lüt. Melchizedek cai pwa eh pa kelungta cingku kedibe teibam dida.