1 Paul penai Timothy, Khrista Jisu kilabe kena ne—Khrista Jisu gade kemcimedung pelane Philippi namdi ga ngqwa muiteume nah deaconme dage kekai. 2 Anui pei Tinggwang nah Rampaube Jisu Khrista dade kegwang ngaugia nah lungciepbe de peu nnuida bam kelube tei lulo.

3 Ih nnuide kensung ramsang, a Tinggwang de twabam muila, 4 a kekie leune ga nnui pelane ziemne, a sui yi eh kie muila, 5 kedanemene nnui raitu benai gade cu kecang samliakeyi ta ketei ga acu ngha kelane. 6 Nah Ih ma aidungde cisiakte bam, nnuida bata keyi ndeu kegaibe de Jisu Khrista cailigwang kera tingba benai kecang tei jüja teicang beuzie. 7 Ainzwa eh Ih nnui pelane ha cetkela au a ziemne petau, kedanemene nnui au a lung ga bam kelane. Ih hebaang ketei nah samliakeyi de gum nah rangmcilia kegai ga nnui pelane acu ngngwa ngaugia ga ncüt kelume. 8 Kedanemene Ih Khrista Jisu keku de teu nnui pelane de dai kenzwa gede reguibam labi kecu Tinggwang au a zierangbe da. 9 Cine a kekie au aide da: maci nah macet pelane ga nnui keku de peu kieesi reureu lu kera, 10 iciu eh peu nnuide yitube kedetlu kera, nah Khrista cailikegwang tingba benai samsang nah kemau gah eh bamlu kerane, 11 Jisu Khrista dade kegwang makesang le kepui tei eh Tinggwang de twa nah tei ndulu kerane.✝

12 Cu Ih peu nnuide ci neula, sinamedung, cide a dage teigai kedidung dene samliakeyi de rangmdi si luda.✝ 13 Cide ziemne, Ih Khrista ziemne hebaang tei lalie kecu Romme gwangpei ki kekwame nah kedamedung pelane da ci gwang dida. 14 Kedanemene Ih hebaangki ga kebamde ne sinamedung kekiee gede Rampaube gade teingkuu si luda, nah penui ngngi mene kuuki eh Tinggwang sam ranglu kera bam dida. 15 Midungge au mide ngau penui riak nah kengaurau eh Khrista ha rangbam, dede kedame au lungsang gade.✝ 16 Kekambe maade keku gade cide tei bamla, acu samliakeyi de gumlu kera ziemne aikage kaipwa kebam ci eh. 17 Dede keraibe maade lungsang gade mene penui ziu cet eh Khrista ha rangla, acu peu hebaang tei eh keherei lu kerane. 18 Dai ah sui? Keheibe gade liede, lungcet kemau gade mede petaube gade liede, Khrista ha rangbam dida, nah Ih aide ga a suiyi. Nah Ih a suiyi lazie, 19 kedanemene nnui kekie gade nah Jisu Khrista Rabe kengha aide gade acu lungmpet beuzie kecu Ih cibam.✝ 20 Ih luu neusüt nah keregui kebam de au Ih madaude ngngam dilak lie kecu deda, dede pelane gade cude, ndaa nzwa, kuusüt eh a pumteih gade Khrista de hetwa peulu kera deda, kering gade liede mede ketsai gade liede. 21 A ziemne au, lungh bam kera au Khrista ziemne, nah tsaidi eh liede kemmi lie. 22 Dede Ih pumteihbe gade ring lazie liecai, cide a ziemne petsi builukera ta teilu kera da. Dede Ih daide kedet ziebi Ih cisiakte meda. 23 Acu kena kakgage niagim pwabam dida. A lungning au tetdi neu nah Khrista de ngngwa ladi kerade, cide au yiki kesang kecune, 24 dede nnui ziemne pumteihbe ga bamsi mai siaki bam reu. 25 Aide cetlu eh Ih nnui pelane de ngngwa bamsi kera Ih cibam, nnui kenlum ga peu yisi nah nnui sui yilu kerane, 26 iciu eh Ih nnuida gwangdai kecudau peu Khrista Jisu gade nnui a ziemne hegie kieeki lu kerane. 27 Dede nnui teilung zaide Khrista samliakeyi de luulu kebui gage lungh gai lulo, ciude Ih nnuida gwang kerengau liede mede bam kemakdau liede, nnui rabe gade ket tei eh sap ntip kebam, ngngwa lungge tei eh samliakeyi kenlum ziemne renia eh tetla kecu Ih nnui ha siulu kerane, 28 nah kehei gade de nnui ngauraumedung de hing so. Aide au penui ziemne penuide ngkapdi kera, dede nnuide kelilu kera marehi ge, nah aide Tinggwang dade gwang. 29 Kedanemene nnuide Khrista ziemne pecu nlumkelu rünne ma, dede peu pe ziemne keherei si kera peu pwabam, 30 kedanemene nnui a rei kengau de nah cu siu kebam de nzwa rei kebamne.