1 Cine, Ih hung nah regui kela, a sinamedung, a suiyi nah a peurwa, ainzwa eh kehung a zangmedung Rampaube gade sap ntip lulo.

2 Ih Euodia penai Syntyche de Rampaube gade ngngwa kelungnzwa lulo kie gaila. 3 Nah kesang a zangbo, mipui aipau kena dede ngha gailo n dade kiela, kedanemene penai samliakeyi kepau ga acu ngngwa heta teigwang kecune, Clement nah mi kedamedung de si eh, penui zi Kering Laisiukwak ga bam.

4 Rampaube gade nnui suiyi lamui lulo. Ih rang daizie, nnui suiyi lulo. 5 Peu mina pelane de nnui zai kenciep de ci lulo. Rampaube cailigwang kera nna dida. 6 Magede cet pwa nnui lung keherei so, dede makeheibe gade nnui nggia kie nah kekie tei pecu twa eh nnui kie kelabe Tinggwang dage peu cigai lulo. 7 Iciude Tinggwang lungciep, ma pelane ci kelabe, Khrista Jisu gade nnui mlung nah nnui lungning gum teula luzie.✝

8 Kamtube, sinamedung, kesangbe, rütlu kebuibe, kemzuibe, kemcibe, hezukeyibe, siu keyibe leune, makeheibe de keyibedung bamcai, nah makeheibe de hetwa peulu kebuibe bamcai, ma aidungde cet bam lulo. 9 Nnui a dade ci nah luukelu nah siu nah ngau kelube tei mzai lulo, iciude Tinggwang lungciepbe nnuida bam luzie.

10 Cu Ih Rampaube gade a sui yisüt bamlie, kedanemene cu peting ketiee ge cai nnui acu helungnei kelade nsungdai kelune. Nnui a mapiela kesang, dede nnui ngha kera peting keyi ngau luma. 11 Ih aide teu maikesia ne rangbam ma, kedanemene a da kebam de teu Ih mnung lu kera cilu delu. 12 Ih ma kegah, nah mbaang eh kebam au dainzwabi kecu ci. Kehei gade nah ma pelane gade kenggei nah kemzeu, mede pui kenlim mede teu maisia de ci luda. 13 Acu teingkieng beu kelabe ziemne Ih ma pelane tei lubui. 14 Ciuliede, nnui a reidung ga acu ngha kegai yizu lie. 15 Nnui Philippime de cibam samliakeyi ndeu kecu dau, Ih Macedonia kahpet dige, nnui gwale ngqwa kedagede makepeu nah luu kecu ta ga acu ngngwa mzi ma, 16 Ih Thessalonica namdi ga kebam daude, Ih teu maisia dige piage swade kiee eh nnui kengha acu langgai beu. 17 Ih mapeu de luuneu kecube ma, dede Ih nnui bata de ziemne kemmi de ngau gaineu lala. 18 Cu Ih ma pelane pui kenlim ngau luda, nah kieesi de luda. Nnui Epaphroditus dage langgai kebeu mapeude cu Ih ngaulwe acu kepui teibam dida. Cidungde au ratak Tinggwang luulu kebui nah pe suiyilu kebui marim kehengui gelie.✝ 19 Cu a Tinggwang pe kendu mahei kebam Khrista Jisu gade nnui teumaikesia leune pwapeu zie. 20 Peu anui Tinggwang nah Peibe de kelungta nah kelungta ndula kelube tei lulo. Amen.

21 Khrista Jisu gade kemcime pelane de kelum gaila. Siname acu ngngwa kelamedung nnuide kelum gaila. 22 Kemcime pelane nnuide kelum gaila, dede bamkeraide Romme gwangpei Caesar kiga kebammedung. 23 Peu Rampaube Jisu Khrista ngaugiabe depeu nnui rabe de ngngwa bam kelube tei lulo. Amen.