1 Paul, Tinggwang lungning gade Khrista Jisu ne langkegaibe nah Timothy anui sinabe ne raupwa,* 2 Colossae namdi ga kemcime nah Khrista gade samsang kela sinamedung dage kekai:

Peu anui Pei Tinggwang nah Rampaube Jisu Khrista de ngaugia nah lungciep nnuide peu kelube tei lulo.

3 Anui nnui ziemne kekie dau anui Tinggwang, anui Rampaube Jisu Khrista Peibe de twabam muila, 4 kedanemene nnui Khrista Jisu de kenlum ha nah nnui kemcime pelane de keku ha anui siu kelune, 5 nah nnui kehengin tinggim ga kaipwa kenzeu de ziemne. Aide nnui ndaa kesangsam Samliakeyi gade siu luda, 6 cide nnui da gwang kelu benai gade nnui siulwe kesangbe gade Tinggwang ngaugia cikelu nzwa, Samliakeyi aide kideu pelane ga petsi bui* nah mmi si reureu bam dida. 7 Nnui cide anui ngngwa heta teikela kehung kilabe Epaphras dade ci luda. Pa au anui keleu tei eh Khrista kila kesamsangbe,* 8 nah pa Rabe gade nnui keku anuide peu ci gaida.

9 Anui aide siukelu benai gade, keku aide ziemne anui mtakdi mene nnui ziemne kiebam. Nnuide peu pe lungning keci maci, nah rabe kilam macet nah maci pelane le kepui teilo kiela. 10 Iciu eh nnui Rampaube lungning tei eh lunghlu kerane nah pesuiyi leune teilu kerane: nnui bata keyi leune gade petsi builu eh nnui Tinggwang maci gade mmi silu kerane. 11 Nnuide peu teilu kebui leune gade pe kendu kengkieng rehi gade teingkieng lu eh helung tiesüt nah liakelu suiyi bamlu kerane. 12 Peibe, nnuide kebaa ga kemcimedung de ngngwa mabam gumlu kebuime tei kebeube de twalu kerane. 13 Tinggwang anuide kemui baang gade kelibeu da nah anuide pe Na pe kube hegwangram gage ngngwa gwang beuda, 14 pe dade anuide rikelu, kemaugi kelude bam dida.*

15 Khrista au ngaula kemak Tinggwang miebe da, damkelu pelane dwa kelabe. 16 Kedanemene pe dade tinggimdung gade nah kideu gade ma pelane damlu, kengaube de nah ngaukemakbe de. Hegwangbamdung mede hegwangramdung mede mapeu teukelame mede kengkieng teu kelamedung, aidungde pelane pa dade nah pe ziemne damgai. 17 Nah pa au ma pelane dwade la, nah pe dage ma pelane keuncüt pwabam.✝ 18 Khrista au pepum, ngqwabe peube da. Pa au pe bangdwabe, ketsaimedung kakgade kwak cuhkelu neraibe da, iciu eh peu pecu ma pelane kakgade raitube teilu kerane. 19 Kedanemene Tinggwang pe da pe zaireli leune la kera pe suilu, 20 nah pe dade ma pelane, kideu gade nah tinggim gade pecu ngngwa kezuyi dailu kerane, pe cross jai le kezuyi teilu. 21 Piage nnuide Tinggwang dade mdeila nah nnui bata kesia ziemne nnui kecet gade pe ngauraume ge teila. 22 Dede cu au pa tsai kegai gade, pe pumteih gade nnuide ngngwa kezuyi dai luda, iciu eh nnuide peu mci nah kemau gah nah mmau gai kelakme tei eh pe dwaga ngngwa gwanglu kerane. 23 Iciude nnui kenlum de ga nlum jüja sap ntiprip nah nnui siukelu samliakeyi kereguide gade nlaidi kerabe ma. Samliakeyi cide tinggim kangga damkelu mina leune dage ledeu gai dida, nah Ih, Paul, samliakeyi cide kila tei dida.

24 Cu Ih nnui ziemne keherei kelade ziemne a suiyi bam, kedanemene Ih a pumteih be keherei eh Khrista pe pumbe, cide ngqwabe ziemne reigai kebeude teicang lalu. 25 Tinggwang acu nlum kebeu gade Ih ngqwabe kila teila, iciu eh nnuide Tinggwang sam peu ci cangsiak lu kerane. 26 Aide au ndaa mmi kekiee ge gade nah ceheudung gade kebai teukela macetkecok deda, dede cu au pe kemcime dage keulia gaida, 27 cipaume dage Tinggwang mahei nah pe kendu macetkecok de Gentileme kakga peu cilu neudi, cide au kendu keregui Khrista nnuida kebam deda. 28 Anui pe ha rang ledeula, mina leune de kecung, nah mina leune de maci pelane teu anui ledeu bam, iciu eh anui mileune de peu Khrista gade yi cangsiaklu kerane. 29 Aide teilu kerane, Khrista kengkieng ada heta tei kebam de gade Ih laikai tei eh heta teisüt bamla.