1 Mpaumedung, nnui kilabaangme de petaube nah kemzuibe peu lulo, kedanemene nnui de tinggim ga mpaube ge kebam cibam lu.✝

2 Sünne eh mtakdi mene kielu, nah kekie keteidau mriak nah ketwa peulu. ✝ 3 Anui ziemne de nzang eh kie bamlo, iciu eh Tinggwang anuide sambe ziemne zuiyi keyi pwapeu eh Khrista macetkecok de ranglu kerane.✝ Aide ziemne Ih hebaangki ga bam da. 4 Ih rangmai kesiabe, Ih rangmci lialu kerane kie lulo. 5 Peting teu ci eh hegwalebieme dade mriak eh lungh lulo.✝ 6 Peu nnui samrangdung ga ngaugia si lamui lu, ncai nzwa kumlu, iciu eh nnui dainzwa eh hangge ge de samkeli beu maisiabi kecu nnui cilu kerane.

7 A ha pelane Tychicus nnui dage ranglia beuzie, pa au Rampaube gade anui hungkela sinabe, nah samsang kela kilabe, nah anui ngngwa kila tei kelabe. 8 Makie aide ziemne Ih pecu langpwa nnui dage kaila, iciu eh nnui anui hadung cilu kerane, nah peu pecu nnui lung teingkuu lu kerane. 9 Onesimus, samsang nah anui hungkela sinabe, nnui maa ga hangge de pecu si eh langgai la. Penai aika tei kedi pelane nnuide ranglia beuzie.

10 Aristarchus, acu ngngwa hebaang tei kebambe, nnuide kelum gaila, nah Barnabas peidana Mark de (pe ziemne sam kaikebeu de nnui ngau luda; magade pa nnuida gwang cai, pecu ngngwa lulo), 11 nah Justus lie qu kelabe Jesus de nnuide kelum gaila. Tinggwang hegwangram ziemne Jewme kakgade nlumkelume aidungde rünne acu ngngwa heta teila, nah penui a lung tei nciep beu. 12 Epaphras nnuide kelum gaila. Pa au nnui kakgade hangge nah Khrista Jisu kilabaangme ge. Pa nnui ziemne laikai tei eh kiebam muila, iciu eh nnui Tinggwang lungning leune cilu eh sap ntiplu kerane. 13 Pa nnui ziemne nah Laodicea namdi ga kebammedung ziemne, nah Hierapolis namdi* ga kebammedung ziemne laikai tei eh heta teikela Ih pe zierang teigai la. 14 Luke, anuide hungkelabe daru kecibe nah Demas nnuide kelum gaila. 15 Laodicea ga kebam sinamedung, nah Nympha, nah pe kilung ga kebam ngqwabe de kelum gailo. 16 Nah laisiu aide nnui kakgade pei lude, cide Laodicea ngqwa gade de peei bilu kera tei lulo, nah nnui de Laodiceame dade laisiu de pei lulo. 17 Archippus dage rang beulo, "Rampaube dade nang ngaukelu zierang ta de pie gailo, iciu eh nang cide tei canglu kerane."

18 Kelum kegai aide au a ba le rau gaila—Paul. Ih hebaang tei kelade nsung lulo. Peu Tinggwang ngaugia nnuide ngngwa la kelube tei lulo.