1 Cine, nnuide Khrista de ngngwa teu cuhlu delie cai, nreulebie Khrista Tinggwang ba zetle kebam ga gudung peei lulo. 2 Nreule kebambedung ha cet bamlo, kideu ga kebambedung ha be mene. 3 Kedanemene, nnui tsaidi da,* nah nnui teilung au Khrista de si eh Tinggwang dage kebai nzeu dida. 4 Khrista, nnui keringriabe mi miakngau tei kegwang dau, cidau nnuide pecu ngngwa kendu ga mi miakngau tei zie.*

5 Cine, kideube hengindung de teitset dilu—kemmha, mcikemak, pumteihbe hengin, kesiabe teikeneu, nah migu kehengin, cide au mamie kereca ge da. 6 Ma aidungde ziemne Tinggwang lunghop gwangzeu.* 7 Ma aidungde ga nnuide piage tetgwang da, cidungde ga nnui lungh keludau. 8 Dede cu au nnui ma aidungde pelane pütdi maisia da—lunghop, rata, lungning kesia, kekii sam, nah nnui mui gade mcikemak samdung kerang. 9 Hangge ge dade kenret so, kedanemene nnui mina kehegwabe zairelidung de keu gidi delu,✝ 10 nah nnui mina kehecibe de teu bah luda, cide maci gade teiheci pwa dam kegaibe rehi nzwa luzie. 11 Cika Greekme nah Jewme, hegeukerum nah rumkemakme, maci kemakme, Scythiame, kilabaang keteime, suirang teikelame, kakga kette kentsam bamsi meda, dede Khrista au ma pelane nah ma pelane ga la.

12 Ciziemne, Tinggwang ne kedetkelume ge, mci nah pekume tei eh, mide ngau kenggia, keku, mizai kehenah, kenciep nah helungketie teu bah lulo. 13 Hangge ge dade nnui lungtie lu nah ngaugia pwa hangge ge dage peulu, magade mige mikeda ge de ncam lacai; Rampaube nnui mau gi kebeu nzwa, nnuide mi mau gi beu maisia. 14 Dede ma aidungde pelane reu, keku de teu bahlu, cide ma pelane kang ncüt kelube da. 15 Nah peu Khrista lungciepbe de nnui lung teu kelabe teilo, cipau lungciep de gage nnuide de qupwa pum ge teilu delu. Nah twa eh lalu. 16 Peu Khrista sambe de nnuida kepui tei eh bamlu. Maci pelane teu eh hangge gede ledeu nah maranglia lu. Lei, ketwalei nah kereca leidung teu Tinggwang de twa eh nnui lung gade pe dage lei tei gailu. 17 Nah nnui ma keheibe ketei gade, sam gade mede bata gade de, Rampaube Jisu zi gade ma pelane tei lu, pe dade Peibe Tinggwang de hetwa peu eh.

18 Minaumedung, nnui nahpeidung kangga lunglu, cide Rampaube dwade petau lu.✝ 19 Minahpeidung, nnui naude hunglu, nah penui dade nnui zaisia so. 20 Henamedung, ma pelane gade nnui puipei samzai teilu, kedanemene aide Rampaube pesui yi lalu. 21 Mipeimedung, nnui name rata tei so, iciu eh penui lung tei ceudi melu kerane. 22 Kilabaangmedung, ma pelane gade kideu ga nnui mpaumedung samzai teilu, mina suiyi tei kerane mi miakngau gade di mene, dede Rampaube mie hing eh lungsang gade teilu. 23 Nnui makeheibe ketei gade de mina ziemne mene, Rampaube ziemne ketei nzwa lungsang gade teilu, 24 nnui Rampaube dade mapwa ziehi ngaulu kera ci eh. Nnui Rampaube Khrista gwa tei bam. 25 Kedanemene masang kemak ta keteibe au pa masang mene tei kegaide ngau dai zie, nah cika heneuherüt gede gah.✝