1 Ih nnui ziemne, nah Laodicea namdi ga kebammedung ziemne, nah kenlumme acu kezungau kemak pelane ziemne dai kenzwa gede reigai bi kecu Ih peu nnuide ci neula. 2 Iciu eh penui keku gade ket teilwe penuide teingkuu lu kerane, nah maci kesangbe ci mci eh Tinggwang macetkecok, cide Khrista de cilu kerane. 3 Pe dage maci nah kecikecet mabam leune kebai pwala. 4 Peu nnuide mide kehedei sam rang eh cwadi melu kerane Ih aide rang gaila. 5 Kedanemene Ih pumteihbe gade nnuide ngngwa bam melie de, Ih au rabe gade nnuida bam. Nnui zai keyi nah Khrista gade nnui kenlum ntip kebam de ngau eh Ih a sui yibam.

6 Ciziemne, nnui Rampaube Khrista Jisu de luukelu nzwa, pe da lungh lulo. 7 Pe dage nnui mahhim ncoklu nah lunghcuh gailu, nah nnuide ledeukebeu de siakte nnui kenlum de ga ntip bamlu, nah hetwa le kepui teilu.

8 Migede de peu Khrista zai rehi kemak, kideube zaisie, nah mina zaisie, kemta maci mide kecwa gade peu nnuide cwadi melu kerane mriak bam lulo. 9 Kedanemene Khrista pumtei ga rabe yi cangsiak kecude lungh bam, 10 nah nnui pe dade nnui teilung yi cangsiak kecu ga gwang luda, pa au kengkieng nah hezai pelane reu pe peube. 11 Nnui pe dade hebale tei kemak geurum de rum luda, pumteihbe pumbe de caudi eh Khrista gade hegeurum luda. 12 Nah nnuide duipum ketei gade pecu ngngwa kung dida, nah pecu ketsai gade teucuh kelube, Tinggwang kengkieng kenlum gade nnuide pecu ngngwa cuh luda. 13 Nnui maudung nah nnui pumteih hegeurum kemak gade nnui tsai kedi dau, pa anui maudung pelane gibeu eh nnuide peu pecu ngngwa ring dailu, 14 anuide mmau kela hezai rauteukela dungde* pa maigi dida, anuide ncau kela zaidung de, delwe cross gage giagai eh pa cide keugi dida. 15 Pa kengkiengdung nah kengkieng keteume reunet keu teudi nah pa penuide pwa mteibe miakngau tei eh cross gade penui reu ngam luda.

16 Cine, migede de peu nnui ketyei ga mede kesak ga, mede hengyi mede keici ngyi, mede Sabbath tingbadung ziemne tiak so. 17 Aidungde au gwanglai eh kela tingkaumiedung delie, dede kesangbe au Khrista. 18 Peu kenret kehenah pesui kelame nah tinggimgwame de reca neu kelame penui miswa yiki lie kelame de peu nnuide mmau diso. Pekie kegah gade mina cikenzwame mina lungning gade ngang lala. 19 Nah penui Khrista, mi pum peube de riangkeu bam meda. Kedanemene pa mi siedung nah nieriadung le pumbe pelane keuncüt lula nah cide Tinggwang ne tei mmi beu eh lungh cuh lula.

20 Nnui Khrista de ngngwa kideu ga gudung dade tsaidi delie cai, daitei eh nnui kideube zaide tei eh lunghla reuno? Daitei nnui hezaidung de mzai la reuno? 21 "Deu so, msi so, tung so!"✝ 22 Aidungde keula eh gahdi la, kedanemene cidungde au mina ne riet nah ledeu kebeu ria gade lu. 23 Hezai aidungde au anuikatei anui maci le teikelu renet nah kenret kehenah kecu nah mipum de teikeherei kegaidung, dede cidungde au pumteihbe hengin kezeulu kera pe keyi magede gah.