1 Jonah heka pok gade RAMPAUBE pe Tinggwang dage kiegai, 2 pa rangdi,

"A lungrei gade, Ih RAMPAUBE da mragai, nah pa acu kelibeu da;

ketsaime deu kecok gade Ih mragai, nah nang a kwa siu luda.

3 Nang acu jaaidi kecok sum gage kelien gai, nah duicui ne acu twagwapung bam;

n kengkieng dui nswakdung a reu mlaibam.

4 Ge Ih ranggai, ‘Acu n dwa gade gwa dida;

dede Ih n kemci kerecaki de nreu piedai zie.’

5 Dui a reu gwa gwang acu cimlu, duikedi ne acu twagwa pung;

jaaidihei a peu kezuilu.

6 Ih lamlwatu mahdung ga nghung da, kideu ga kebam riedung le acu kelungta twagwalu;

dede RAMPAUBE a Tinggwang, nang hekwaki kecok gade acu ngngwa nghangdai beu da.

7 A rabe nnei kedi dau, Ih RAMPAUBE de nsunglu,

nah a kekie, n kemci kerecaki ga nda gwanglu.

8 Kemta mamiedung reca kelamedung

penui samkakkelu kesamsang de gi dida.

9 Dede Ih au ncu ketwa le pwa ratak tei beuzie;

Ih sampet kelude teicang zie.

Kelikelu au RAMPAUBE dade gwangla!"

10 Pecai RAMPAUBE heka de aja kaigai, ge heka Jonah de hangdeu kecang gage mlwak mpet gaibeu.