1 Jonah aide pesui mezingdi, nah pa pe ratadi. 2 Cine pa RAMPAUBE dage kie eh rangdi, "O RAMPAUBO, Ih a deudi ga kebam dau aide a sam meni? Aide ziemne Ih Tarshish gage pakgai kera a laikai tei, kedanemene nang au ngaugia nah keku Tinggwang kecu Ih ci, nlung tiesüt nah samsang muila, nah nang au kesia ketei gade nlung nreu dila. 3 Cine cu, RAMPAUBO, Ih n dade a ngia kiela, acu peu tsai dilu. Kedanemene Ih ringkebam swa tsai kedibe yiki dida."

4 Nah RAMPAUBE Jonah de keligai, "Nang aide ziemne n rata kera petau ni?"

5 Cipau cai Jonah namdi gwale mpetlwe naimiak kepetle de namdi kengau ga ntumlu. Nah pa cika pe ziemne kensiu bam ge teilwe pa cipau sung kangga ntumlu, namdi de dainzwa dizie bi kecu kwa eh pie kera.

6 Cidau RAMPAUBE Tinggwang tsingbang ge de peu lungh cuhlu, Jonah de sunglu kerane nah peu pecu reluilu kerane. Nah Jonah tsingbang de ngau pesui sütlu. 7 Dede pecai benai tingcang nuge Tinggwang peu tangseu ge de tsingbang de tei msiadi kera kaigai; nah cide tsingbang de tyeidi, ge reguidi. 8 Nah naimiak pet herizi, Tinggwang naimiak kepetle tingkai kelum ge langgai; ge Jonah peu pusütdi eh pa kaudi kera nzwadi. Cidau pa pe rabe de tsaidi lo eh kie eh rangdi, "Ih ringkebam swa tsai kedibe yiki dida."

9 Cidau Tinggwang Jonah de keteugai, "Nang tsingbang de ziemne nrata kera petau ni?" Nah Jonah rangdi, "Ih a rata kera petau lie, tsailu kera kecang de."

10 Ge RAMPAUBE rangdi, "Nang au, nang magede teigai kemak mede nang tei mlunggai kemak tingbang de ziemne n lung siala; tsingbang cide zeuziu ge gage lungh cuhlu nah cide zeuziu ge gage tsaidi. 11 Cine Ih, namdi kedi Nineveh, cika minadung 120,000 swade kiee bam, minadung penui ba zetle nah hile ci ntsamlu kemakmedung, nah makaune kekiee de si eh kebam ziemne a lung sialak ni?"