1 Aide Jotham, Ahaz, nah Hezekiah, Judah gwangpeidung tingdau, RAMPAUBE sam Morashtitme nam Micah da gwang, pa Samaria nah Jerusalem ziemne kengau de. *

2 Kingneilu, nnui heleuh pelane.

Kingneilu, kideu, nah nda kebam leune.

Peu RAMPAUBE Tinggwang de peu n zierang teilo,

Rampaube pe kerecaki kemci gade.

3 Pielu, RAMPAUBE pebam gade gwang kela;

pa nhung delwe tet gwang zie

kideu tu kehudung ga.

4 Pe kang gade lamlwatudung sui dizie;

langkam pang lamna dizie,

maca mi dwa ga kebam nzwa,

dui hangdeutudung gade lwamie kela nzwa hangdeulangkie ga lwa mie zie.

5 Aide pelane Jacob mau ziemne,

nah Israel kilungme maudung ziemne.

Jacob mau de dai no?

Cide Samaria meni?

Judah mamie kereca kehu bam dai no?

Cide Jerusalem meni?

6 "Ih Samaria de luh ga ma heswa kelu ge tei ngkap dizie,

kubebangdung ling kera heni ge,

nah Ih pegu tangtsudung rui mie hangdeu langkam gage kai dizie

nah Ih pe bangdwadung de keu gidi zie.

7 Pegu mamiedung pelane teipop kecai dizie,

nah pa ngau kelu mapeudung pelane mi le ru dizie,

nah Ih pegu mamiedung pelane tei msia dizie.

Kedanemene pa helipuidung gu mahidung pwa hebau kelune,

cidung de helipuidung gu mahi ge dai dizie".

8 Pecai Micah rangdi, aide ziemne Ih hap nah hei zie;

Ih a picum pung mene nah paula eh tet zie;

Ih maiserungdung nzwa mra zie

nah biangkang ge nzwa hap zie.

9 Kedanemene Samaria zam lai gai lak di,

Kedanemene aide Judah ga gwang cangdi.

Cide a mina rieki ga gwang cang bam,

Jerusalem kecang.

10 Gath namdi gade cipau ha de rang so,

nnui kette hap so.

Beth Leaphrah ga Ih akatei rebui ga mlak. *

11 Tet kahdi, Shaphir ga kelunghmedung,

paula nah ngngam eh.

Zaanan nam ga kelunghme hegwale tet pet so.

Beth Ezel nam hap,

penuide kegumbe keuteu kedine.

12 Kedanemene Maroth ga kelunghmedung sam keyi de penui kwagai kelak tei bam dida,

kedanemene kekap RAMPAUBE dade

Jerusalem riekidung ga hung bam kedine.

13 Bagi de hekwendung maa gage kailu, Lachish ga kelunghmedung.

Nnui, Lachish nam, Zion napui ziemne kemau pendeube,

kedanemene Israel gikahkedi de nnui dade ngau kelune.

14 Cine nnui Moresheth Gath de kelamna mapeu peu zie;

Akzib nam ne Israel gwangpeidung regui de tei nggah dizie.

15 Ih nnuide ngkieng kelube ge teugwang dai beuzie,

Mareshah nam ga kelunghmedung;

Israel gu kebaa kedi de Adullam tsupop ga gwang di zie.

16 Nnui peu tai di

nah nnui tam biet di nnui hung kela namedung ziemne.

Nnuikatei nnuide tei kwak pwa heliedung nzwa lu,

kedanemene nnui namedung de nnui dade deudi kemdei gage langgai dizie delu.