1 Kemau ciem rim kebam mede daikenzwa gede kengngi bam no,

zeudung gade kemau tei kera rim kebam mede.

Tingcang keba dau penui tei lu la

kedanemene penui kengkieng kebamne.*

2 Mina luhdung luu neu la nah swet lu la;

penui kidung luu neu la nah keu teu dila.

Penui mina de nah pe ki de teingkau,

minabe nah pe mabam de.*

3 Ciziemne RAMPAUBE aide rang,

"Pielo, Ih kengkap aipau pautsa dage teu gwang gai kera riem bam dida,

cika de nnui n ngwangdung cide mbai gailak.

Nnui ngang eh tet lak ta,

cidau kesia ting ge dizie kecune.

4 Cipau benai minadung nnui ziemne lei ge tei zie,

hap nah sahbak eh kehap leidung tei zie. Penui lei tei eh, ‘Anui Israelme de ngkap dida;

RAMPAUBE a mina deu keu kedet dida.

Pa dainzwa a dade aide keu mpet zie no?

Pa mide cwa kelamedung de anui luhdung mzi mpet beu dida!’"

5 Ciziemne, keheimedung nnui mabam mzi beu kera nnui leuhdung dacak tei kera gah dizie

RAMPAUBE dwa gade.

6 "Caihasam rang so,"

de eh penui rang.

"Penui aipau samdung de teu caihasam rang kerabe ma;

hengam teu gwang kera be ma."

7 Cide rang bi mai sia ni, Jacob leuhme,

"RAMPAUBE rabe pe rata di deni?

Aide RAMPAUBE tadung kesang ni?"

Petaube ga tet kela keheibe dade a samdung yi la melui ni?

8 RAMPAUBE keligai, cudau a minadung ngauraume nzwa cuh dida.

Nang mikangge magede mning msia mezing eh tetkah kelame dade pe pai, pe nia keuteudi,

reugwamedung hereu gade cailigwang kilung ga kwak bam lu ra cet kela kenzwame dade.

9 Nnui a minadung mipuidung de penui ku kela penui kidung gade gwa mpetti;

Nnui kelungta a samlam kebeu penui name dade keuteu dida.

10 Cuh lwe tet cu, aipau heni ga nnui bam kerabe ma,

kedanemene cide mcikemakne;

tei ngkap zing dida.

11 Magade mige kenret kela rabe nnui da gwang rang cai,

"Kubetsi zau nah kengkieng zau ha Ih nnui da rang zie,"

aipau me ziemne pecu le pwa caihakecime lie dizie.

12 Ih nnui pelane de teu ncüt bi lu zie, Jacob leuhme.

Ih bang kebam Israelme de teu hekwa bi luzie.

Ih nnuide meurün penui maa ga gwang dai kelabe nzwa teugwang hekwa luzie,

tseheideu ga meurün le pui kebam nzwa.

Cika mina kiee kedine ma kwa cisüt kecu bam zie.

13 Mige penui lampui ngkei kebeube penui dwa tet gwang zie.

Penui herieki tei pangpop lwe tet mpet zie;

penui gwangpei RAMPAUBE penui dwa rai zie.

RAMPAUBE ne penui peu ga bam zie.