1 Dede tingba kamtu benai

RAMPAUBE ki gu lamlwatu

keda lamlwatudung kakde hutube dizie.

Hangdeutudung reu cide de teucehu dizie,

nah minadung pelane cika ge tet gai zie.

2 Heleuhdung kekiee ge mie nah rang zie,

"Gwang lu, anui RAMPAUBE lamlwatu ga hang go,

Jacob Tinggwang ki ga.

Pa anuide peu tei neu kelabe ledeu beuzie,

nah anui pe lampuidung ga tet zie."

Zion gade hezai mpet zie,

nah RAMPAUBE sam Jerusalem gade.

3 Minadung kekieege kakga pane hetutiak zie

nah heleuhdung kekiee kemdei ga la kela leune de tiak zie.

Penui penui kingtiedung pwa hepei rekilu zie

nah penui ngeidung pwa hekiedung tei luzie.

Heleuh ge heleuh keda gede ngaurau eh kiengtie pwa cu lak,

Penui hereu tei kera cim de heteu dai lak ta.

4 Meliene, mina leune pegu kubebang kangga

nah pegu nzütbang kangga bam zie.

Migede penuide keheu lak,

kedanemene reugwame reu RAMPAUBE mui gade rangdi delu.*

5 Kedanemene mina leune,

hangge ge kecu, penui rabe zi gade tet la.

Dede anui au RAMPAUBE anui Tinggwang zi gade

kelungta nah kelungta tet la zie.

6 "Cipau benai", aide RAMPAUBE ne ndugai,

Ih swa kelame

nah gi kedime de hekwa luzie,

Ih ne tei keherei kedime de.

7 Ih swa kelame de bangpwa kebamme tei luzie,

nah gwagi kedimedung de heleuh kengkieng ge tei luzie,

nah Ih, RAMPAUBE, Zion Deutu gade penui reu ga hegwang tei zie,

cu nah kelungta.

8 Nnui au, meurün nadung reketbam,

Zion napui gu hangdeutu,

Nnui da cide gwang zie, ndaa nnui gu hegwangram de tei dai luzie,

Jerusalem napui gu hegwangram de.

9 Cu, nnui daitei mrung la no?

Nnui kakga hegwangpei gede gah ni?*

Nnuide ledeu kebeu be tsaidi ni?

Aide ziemne mipui henatet keteei de nzwa nang teei lani?

10 Teei eh bam di

nah henatet teei lalu,

Zion napui,

mipui henatet keteei de nzwa.

Cu au nnui namdi gade tet mpet dizie,

luh ga lunghlu,

nah Babylon deudi ga mielu.

Cikade nnuide kelilu zie.

Cika de RAMPAUBE nnuide

nnui ngauraume dade keli beuzie.

11 Cu heleuhdung kekieege nnuide renia kera ngkwalu da;

penui rang, ‘Pecu peu heradi;

peu Zion kau kedi ngau luzie.’

12 Penui RAMPAUBE lungningdung cima,

penui pe mariemdung de ci cang ma,

pa penuide hecaipung neu kera meibangdung mtei kelu nzwa hekwa lu.

13 Cuhlu nah teicu, Zion napui,

Ih n kii tei pwa hegeu kii tei beuzie,

nah Ih n nginglwak hetageu ge teibeu zie.

Nnui minadung kekiee de teipop dizie nah nnui penui mahei mci kemak de pwa RAMPAUBE de peuzie,

penui mahei kideu pelane reu Rampaube de."