1 Ih ranggai, "Cu kingneilu,

nnui Jacob muiteumedung

nah Israelme gwangdung:

Nnui kemzuibe ci kera petau meni?

2 Nnui keyibe kengkaume

nah kesiabe nnui sui la,

nnui a mina de mring penui geu gau,

penui radung gade penui teih gau,

3 nnui a mina teih de tyei kelame,

nah penui geu gau mpetdi,

penui radung tei cum

nah dang kecaidi,

li gage heteih kai kera ge nzwa,

li kenggwa ge ga heteih lang kera ge nzwa,

4 Pecai nnui hegwangmedung hap eh RAMPAUBE dage kengha kie gai zie,

dede pa nnui sam kelibeu lak.

Pa cipau tingdau nnuide pie de lak,

kedanemene nnui kemau tadung tei kedine."

5 RAMPAUBE aide rang,

"A mina lampui sau maukedi caihakecimedung ziemne,

mige penuide matyei kera pwapeu liecai,

penui ranggai la, ‘Kezuyi.’

Dede magade pa penui muidung gage made kaibeu tadi cai,

penui penuikatei penuide pecu renia kera mtei lula.

6 Ciziemne, nnui ziemne mui dizie nah ma ngau tadi zie;

nnui ziemne mui dizie iciu eh peu ncu reka ta tei tadi zie.

Caihakecimedung da tingnaimiak nghung dizie,

nah penui tingba penui da mui dizie.

7 Ma ngau kelamedung de hengam tei dizie,

nah rekame ma cetci tadi zie.

Penui pelane penui muileudung gum dizie,

a dade samli gede ngaulu kemakne."

8 Dede a ziemne au, RAMPAUBE rabe kengkieng le acu pui,

nah ada kemzui nah kengkieng le pui,

Jacob leuhme dage pe mau ndugai beu kera,

nah pe mau Israelme dage.

9 Cu aide kingneilu,

nnui Jacob leuhme muiteumedung,

nah Israel leuhme hegwangmedung,

nnui kemzuibe ngkau kelabe,

nah maleune petau kemak be petau lie kelame.

10 Nnui Zion hejai le

nah Jerusalem petau kemak le teilu.

11 Cipau namdi muiteumedung tutiak hetau henim ziemne,

n cingkumedung penui kangzi ziemne ledeu bamla,

nah nnui caihakecimedung rangkang ziemne keulia kegaidung tei bamla.

Ciude nnui RAMPAUBE da ngngei nah rang,

"Rampaube anui de ngngwa la meni?

Makesia gede anui da gwang lak."

12 Ciziemne, nnui ziemne,

Zion luh puu kedi ge dizie,

Jerusalem tsura pangpop kedi tum ge nzwa dizie,

nah hangdeutu kerecaki de hegung ge dizie.